މަސްވެރިކަމުގެ ސިނާޢަތު ކުރިއެރުވުމަށް 5 ބިލިއަން ރުފިޔާ އިންވެސްޓްކުރަން ނިންމައިފި

މަސްވެރިކަމުގެ ސިނާޢަތު ކުރިއެރުވުމަށް 5 ބިލިއަން ރުފިޔާ އިންވެސްޓްކުރަން ނިންމާ، މަސްވެރިކަމުގެ ސިނާޢަތު ކުރިއެރުވުމަށް ސަރުކާރުން ރާވާފައިވާ މަޝްރޫޢުތަކަށް ބޭނުންވާ މި ހުރިހާ ފައިސާއެއް ހަމަޖެހިފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމް ވިދާޅުވީ މަސްވެރިކަމުގެ ސިނާޢަތުގައި ސަރުކާރުން އެންމެ ބޮޑަށް އިސްކަންދެނީ މަސްވެރިން ކިރުވާ މަހަށް އަވަހަށް ފައިސާ ފޯރުކޮށްދިނުމާއި، ފަސޭހައިން އައިސް ލިބޭނެ މަގު ތަނަވަސްކުރުމަށް ކަމަށެވެ. އަދި މަހުގެ އެކި ބާވަތްތައް އެކްސްޕޯޓުކުރާނެ އިތުރު މާކެޓްތައް ހޯދުމަކީވެސް ސަރުކާރުން އިސްކަންދޭ މަސައްކަތެއްކަމަށް ވިދާޅުވިއެވެ.

މަސްވެރިކަމުގެ ސްޓޯރޭޖް ކެޕޭސިޓީއާ ގުޅޭގޮތުން ވަޒީރު ވިދާޅުވީ، މިހާރު އެއްގަމުގައި ހުރި 4200 ޓަނުގެ ސްޓޯރޭޖް ކެޕޭސިޓީއަކީ އެންމެ އެކަށީގެންވާ މިންވަރެއް ނޫންކަމަށެވެ. ނަމަވެސް ކުރިއަށް އޮތް ދޮޅު އަހަރާއި ދެ އަހަރާ ދޭތެރޭގައި އައު މަޝްރޫޢުތައް ނިމުމުން، ކަނޑުމަތީގެ ބޯޓުތަކާއި އެއްގަމުގެ ސްޓޯރޭޖް އެއްކޮށްލައިގެން 25000 ޓަނުގެ ސްޓޯރޭޖް ކެޕޭސިޓީއެއް ޤާއިމްކުރެވޭނެކަމަށް ވިދާޅުވިއެވެ.

މަސްވެރިކަމުގެ ސިނާޢަތު ކުރިއެރުވުމަށް ބޭނުންވާ ފައިސާ ހޯދުމުގައި ޕްރައިވެޓް ޕާޓީތަކާއި، ބޭންކުތަކާއި އެހެނިހެން ފަރާތްތަކުގެ އެހީތެރިކަން ހޯދިދާނެކަމަށް ވަޒީރު ފާހަގަކުރެއްވިއެވެ. އަދި މި މަޝްރޫޢުތަކަށް ބޭނުންވާ ހުރިހާ ފައިސާއެއް ރައީސުލްޖުމްހޫރިއްޔާ ވަނީ ހޯއްދަވާފައިކަމަށް ވިދާޅުވިއެވެ.

މަސްވެރިކަމުގެ ސިނާޢަތު ކުރިއެރުވުމަށް ސަރުކާރުން އިތުރު މަސައްކަތްތަކެއްވެސް ކުރަމުންދާކަން ވަޒީރު ފާހަގަކުރެއްވިއެވެ. އޭގެ ތެރޭގައި ގިނައިން މަސް ބާނާ ދުވަސްވަރު ދަތިކަމެއް ނެތި މަސްވެރިންނަށް އައިސް ލިބޭނެ މަގު ފަހިކުރުމަށް، ދޯނިފަހަރުގައި ލޮނުފެނުން މަސް ފިނިކުރާ ނިޒާމް (އާރުއެސްޑަބްލިއު ސިސްޓަމް) ހަރުކުރުމަށް ލުއި ލޯނު ދޫކުރުން ހިމެނެއެވެ.