މޯލްޑިވިއަން އެއާލައިން ޗައިނާގެ ހަތަރު ސިޓީއަކަށް ދަތުރުތައް ފަށަނީ

މޯލްޑިވިއަން އަކީ ދިވެހިރާއްޖޭގެ ރަމުޒެއް

ގައުމީ އެއާލައިން، މޯލްޑިވިއަން އިން އަންނަ ޖެނުއަރީ މަހު ވައިޑް ބޮޑީ އެއާކްރާފްޓް ބޭނުންކޮށްގެން ޗައިނާގެ ހަތަރު ސިޓީއަކަށް ދަތުރުތައް ފަށާނެ ކަމަށް ޓްރާންސްޕޯޓް އަދި ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެއެވެ.

މި ދަތުރުތައް ފެށުމަށް ބޭއްވުނު ހަފްލާގައި މިނިސްޓަރު އަމީން ވިދާޅުވީ 2025 ވަނަ އަހަރުގެ ޖެނުއަރީ މަހުން ފެށިގެން ބެއިޖިން، ޝަންހާއީ، ޗެންގްޑޫ، އަދި ޝިއާން އަށް ދަތުރުތައް ފަށާނެ ކަމަށެވެ. މި ދަތުރުތަކުގެ ސަބަބުން ފަތުރުވެރިކަމާއި ދަތުރުފަތުރު ކުރުން އިތުރަށް ފުޅާވެގެންދާނެ ކަމަށް އެމަނިކުފާނު ވިދާޅުވިއެވެ.

ވައިޑް ބޮޑީ އެއާކްރާފްޓްތަކުން އެއްފަހަރާ 264 ފަސިންޖަރުންނަށް ދަތުރުކުރެވޭނެއެވެ. އަދި މި ބޯޓުތަކުން ދުރު މަންޒިލްތަކަށް ސީދާ ދަތުރުކުރުމުގެ ޤާބިލުކަން ލިބިގެންދާނެއެވެ.

ޗައިނާގެ އިތުރުން، ޔޫރަޕުގެ މަންޒިލްތަކަށް ވެސް މޯލްޑިވިއަންގެ ވައިޑް ބޮޑީ އެއާކްރާފްޓުގެ ދަތުރުތައް ފަށާނެ ކަމަށް ރައީސް މުއިއްޒު ވަނީ މީގެކުރިން ވިދާޅުވެފައެވެ.

މި ވަގުތު މޯލްޑިވިއަންގެ ފްލީޓުގައި 13 ބޯޓު އޮތްއިރު، އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ވެސް ހިމެނެއެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓު އެކަންޏެވެ. މޯލްޑިވިއަން އިން މި ވަގުތު ދަތުރުކުރަނީ ރާއްޖޭގެ 16 މަންޒިލަކާއި އިންޑިއާގެ ތިން ސަރަހައްދަކާއި ލަންކާ އަދި ބަންގްލަދޭޝަށެވެ.

މޯލްޑިވިއަން