އަމީނަށް ހެދިގޮތް ރައީސަށް ހަދަން ޖެހިދާނެ ކަމަށް ބުނި މައްސަލަ ވަގުތުން ބަލަން ގޮވާލައިފި

ދިވެހި ޖުމްހޫރިއްޔާގެ ފުރަތަމަ ރައީސް މުޙައްމަދު އަމީނަށް ހެދި ގޮތް ރައީސް ޑރ. މުޙައްމަދު މުއިއްޒަށް ހަދާފާނެ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވި މައްސަލަ، ވަރަށް ސީރިއަސް ކަމާއެކު ވަގުތުން ބަލާން ޖެހޭ ކަމަށް ރައްޔިތުންގެ މަޖިލީހުގެ ރައީސް އަބުދުއްރަހީމް އަބްދުﷲ ވިދާޅުވެއްޖެ އެވެ.

އެމްޑީޕީން ހދ. ކުޅުދުއްފުށީގައި ބޭއްވި ޖަލްސާއެއްގައި އެ ޕާޓީގެ އެކްޓިވިސްޓަކު ވަނީ ރައްޔިތުން ނިކުމެ ރައީސް އަމީން ހަވަރަށްދީ، އަނިޔާކޮށް، އަވަހާރަކޮށްލި ހާދިސާ ސިފަކޮށް، އެގޮތް ރައީސް މުއިއްޒަށް ވެސް ހަދަންވީ ކަމަށް ދޭހަވާ ފަދަ އިބާރާތަކުން ވާހަކަ ދައްކާފަ އެވެ.

އެކްޓިވިސްޓް، އެހެން ބުނެފައިވަނިކޮށް އެމްޑީޕީގެ ޗެއާޕާސަން ފައްޔާޒް އިސްމާއީލް، ނޫސްވެރިންނާ އިއްޔެ ބައްދަލުކުރައްވާ ވަނީ އެ ވާހަކަތައް ދިފާއު ކުރައްވާފަ އެވެ.

ފައްޔާޒު ވިދާޅުވީ އެމީހާ އެ ދެއްކީ ރައީސް މުއިއްޒަށް ނަސޭހަތެއް ދިނުމުގެ ގޮތުން ކަމަށް އޭނާ ގަބޫލުކުރައްވާ ކަމަށެވެ. އަދި ރައްޔިތުންނަށް ދެރަ ދިނީމަ މުޙައްމަދު އަމީނަށް ހެދި ގޮތް ހަދަން ޖެހޭ ކަމަށް ވެސް ވިދާޅުވި އެވެ.

"ރައްޔިތުންނަށް ދެރަ ދިނީމާ ހަމަ މުހައްމަދު އަމީންއަށް ހެދި ގޮތް ހަދަން ޖެހޭނީ، އެހެން ކޮން ގޮތެއްތޯ ހަދާނީ؟ އެއީ ދިވެހިރާއްޖޭގެ ތާރީހު ދައްކާފައި އޮތް ހަގީގަތް،" ފައްޔާޒު ވިދާޅުވެފައިވެ އެވެ.

ފައްޔާޒުގެ އެ ވާހަކަ ކޮޅުގެ ވީޑިއޯއެއް ޕޯސްޓް ކުރައްވައި، އަބްދުއްރަހީމް ވިދާޅުވީ އެއީ ކަނޑައެޅިގެން ޓެރަރިޒަމަށް ހިތްވަރުދިނުން ކަމަށާއި އެފަދަ ވާހަކަ އެއް ދެއްކުމަކީ އާދައިގެ ކަމެއް ކަމަށް ބަލައިގެން ނުވާނެ ކަމަށެވެ.

"މިއީ ކަނޑައެޅިގެން ޓެރަރިޒަމަށް ހިތްވަރުދިނުން. މިއީ ކަމާގުޅޭ މުއައްސަސާތަކުން ވަރަށް ސީރިއަސްކަމާއެކު ވަގުތުން ބަލަންޖެހޭ ކަމެއް. އަމުދުން އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު މިފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެންނުވާނެ، އަދުރޭގެ ޓްވީޓްގައިވެ އެވެ.

މުޙައްމަދު އަމީން ދީދީ އަށް ހެދި ގޮތް ރައީސް މުއިއްޒަށް ހަދަން ޖެހިދާނެ ކަމަށް ފައްޔާޒް ވިދާޅުވި މައްސަލަ ތަހުގީގުކޮށް ފިޔަވަޅު އަޅަން ގޮވާލައި ރައްޔިތުންގެ މަޖިލީހަށް މިއަދު ވަނީ ކުއްލި މައްސަލައެއްވެސް ހުށަހަޅައިފަ އެވެ.

ކުއްލި މައްސަލަ ހުށަހެޅުއްވީ މިލަންދޫ ދާއިރާގެ މެންބަރު ހަސަން މުފީދު އެވެ.