މަސްވެރިން ކުރާ މަސައްްކަތުގެ އަގު ވަޒަންކުރުމަކީ ގައުމީ ވާޖިބެއް: ރައީސް

ރާއްޖޭގެ މަސްވެރިންގެ ދުވަހާ ގުޅިގެން ދިވެހި މަސްވެރިންކުރާ މަސައްކަތުގެ އަގުވަޒަންކުރުމަކީ ގައުމީ ވާޖިބެއް ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މިއަދު ފާހަގަކުރާ ރާއްޖޭގެ މަސްވެރިންގެ ދުވަހުގެ މުނާސަބަތުގައި 'އެކްސް' މެދުވެރިކޮށް ކުރެއްވި ޕޯސްޓެއްގައެވެ.

ރައީސްގެ ޕޯސްޓުގައި ދިވެހި މަސްވެރިން އަތްވާއި ވާރޭގައި ރެޔާއި ދުވާލު ކުރާ މަސައްކަތް ފާހަގަ ކުރައްވާފައިވެއެވެ. "އަތްވާއި ވާރޭގައި، ރޭގަނޑު، ބިޔަ ކަނޑުތަކުގައި ދިވެހި މަސްވެރިން ކުރާ ހިންމަތުގެ އަގު އިހުތިރާމާ އެކު ވަޒަންކުރުމަކީ ގައުމީ ވާޖިބެކެވެ،" ރައީސްގެ ޕޯސްޓުގައި ވިދާޅުވެފައިވެއެވެ.

މަސްވެރިންގެ އަގު ވަޒަން ކުރުމަކީ ގައުމީ ވާޖިބެއްކަމަށް ރައީސް ވިދާޅުވި އިރު، މަސްވެރިންނަށް އިތުރު ލުޔެއް ގެނެސްދެއްވާފައިވެއެވެ. އެގޮތުން ބޭންކް އޮފް މޯލްޑިވްސްގައި އެކައުންޓް ހުޅުވާފައިވާ މަސް ދޯނިތަކަށް، މިއަދުން ފެށިގެން މަސް ކިރުވާތާ 48 ގަޑިއިރުގެ ތެރޭގައި ފައިސާ ޖަމާވާން ފަށާނެ ކަމަށް ރައީސް ވަނީ އިއްޔެ ވިދާޅުވެފައެވެ.

މި ނިންމުމަކީ މަސްވެރިންނަށް ލިބިގެންދާނެ ވަރަށް ބޮޑު ލުޔެއް ކަމަށް ބެލެވެއެވެ. އެހެނީ ކިރާ މަހަށް ލިބެން ޖެހޭ ފައިސާ ނުލިބި ލަސްވުމަކީ ދިވެހި މަސްވެރިންގެ އެންމެ ބޮޑު އެއް ޝަކުވާ ކަމުގައިވާތީއެވެ.

މަސްވެރިންގެ ދުވަހާ ގުޅިގެން ރައީސް މުއިއްޒު ދެއްވާފައިވާ މި މެސެޖަކީ މަސްވެރިންގެ މަސައްކަތުގެ އަގު ވަޒަންކުރުމުގެ މުހިންމުކަން ފާހަގަކޮށް، އެ ދާއިރާއަށް އިތުރު ކުރިއެރުން ހޯދައިދިނުމަށް ސަރުކާރުން ދެއްވާ އަހައްމިއްޔަތުކަން ދައްކުވައިދޭ ކަމެއް ކަމުގައި ފާހަގަކުރެވެއެވެ.