އަސަދުގެ ވެރިކަން ވެއްޓުމާއެކު ޔަހޫދީން އިތުރު ބިންތައް އިސްތިޢުމާރުކޮށްފި

ސޫރިޔާގެ ރައީސް ބައްޝާރު އަލް-އަސަދުގެ ވެރިކަން ވެއްޓުމާއެކު، ޔަހޫދީ ދައުލަތުން ވަނީ އިތުރު ބިންތައް އިސްތިޢުމާރުކުރުމުގެ މަސައްކަތް ފަށާ ބައެއް ބިންތައް އެމީހުންގެ އިސްތިއުމާރުގެ ދަށަށް ގެންގޮސްފައެވެ.

އެގޮތުން އަސަދުގެ ވެރިކަން ވެއްޓުމުން ޔަހޫދީ އިސްތިޢުމާރީ ފައުޖުން ވަނީ ސޫރިޔާގެ ސަރަޙައްދީ ރޮނގުގެ އިން ފަހަތަށް ޖައްސައި އިތުރު ސަރަޙައްދަކަށް އަތްގަދަކޮށްފައެވެ. ޔަހޫދީންގެ ބޮޑުވަޒީރު ބެންޖަމިން ނަތަންޔާހޫ ވަނީ މި އައު ސަރަޙައްދުތަކަށް ޒިޔާރަތްކޮށް، އަސަދުގެ ވެރިކަން ވެއްޓުން ތާރީޚީ ކާމިޔާބީއެއްގެ ގޮތުގައި ސިފަކޮށްފައެވެ.

ނަތަންޔާހޫ ބުނެފައިވަނީ އަސަދުގެ ވެރިކަން ވެއްޓުނީ ޔަހޫދީ އިސްތިޢުމާރީ ފައުޖުން އީރާނާއި ލުބުނާނުގެ ޙިޒްބުﷲ ޖަމާޢަތާ ދެކޮޅަށް ދިން ވަރުގަދަ ޙަމަލާތަކުގެ ސަބަބުން ކަމަށެވެ. އަދި މިކަމުން ޔަހޫދީންނަށް އިތުރު މަގުތަކެއް ފަހިވެފައިވާ ކަމަށްވެސް އޭނާ ބުނެފައިވެއެވެ.

އަސަދުގެ ވެރިކަން ވެއްޓުނު ދަނޑިވަޅާ ދިމާކޮށް ޔަހޫދީ އިސްތިޢުމާރީ ފައުޖުން ވަނީ ސޫރިޔާގެ ވެރިރަށް ދިމިޝްޤަށް ބޮން އަޅައިފައެވެ. އިތުބާރުހުރި މަސްދަރުތަކުން ބުނެފައިވާ ގޮތުގައި މި ޙަމަލާތަކުގެ މަޤްޞަދަކީ ސޫރިޔާގެ އަސްކަރިއްޔާއިން ދޫކޮށްލާފައިވާ މިސައިލުތަކާއި ރޮކެޓުތައް ހަނގުރާމަވެރި ޖަމާޢަތްތަކުގެ އަތްދަށަށް ދިޔުމުގެ ކުރިން ނައްތާލުމެވެ.