މިއަހަރު 260 އަށްވުރެ ގިނަ ފުލުހުންނަށް ބޭރުގެ ތަމްރީނު ފުރުސަތު ދެވިއްޖެ: ސީޕީ ޝުޖާއު

މިއަހަރު އެކަނިވެސް 260 އަށްވުރެ ގިނަ ފުލުހުންނަށް ރާއްޖެއިން ބޭރުގެ ތަމްރީނުތަކުގައި ބައިވެރިވުމުގެ ފުރުސަތު ދެވިފައިވާ ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.

ސީޕީ ޝުޖާއު މިހެން ވިދާޅުވީ ފުލުހުންގެ 37 ވަނަ ޕޮލިސް އިނީޝިއަލް ޓްރެއިނިންގ ކޯހުގެ ދަސްވެނިވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. ފުލުހުންނަށް ބޭނުންވާ ތަޢުލީމާއި ތަމްރީނާއި ހުނަރުތައް އިތުރަށް ފުޅާކުރުމަށް ރާއްޖެއިންނާއި ރާއްޖެއިން ބޭރުން ފުރުސަތުތައް ހޯދައިދެމުން އަންނަ ކަމަށް ސީޕީ ފާހަގަކުރެއްވިއެވެ.

މި ފުރުސަތުތައް ލިބެނީ ސަރުކާރުން އެކަމަށް ނުހަނު ބޮޑު އިސްކަމެއް ދެއްވާ، އެކަން ހަމަޖައްސައިދެއްވާތީ ކަމަށް ސީޕީ ވިދާޅުވިއެވެ. އަދި އެކަމަށްޓަކައި އަދުގެ ސަރުކާރަށް އިޚްލާޞްތެރިކަމާއެކު ޝުކުރު ދަންނަވާ ކަމަށްވެސް ވިދާޅުވިއެވެ.

ދަސްވެނިވި އޮފިސަރުންނަށް ނަސޭހަތްތެރިވެވަޑައިގަންނަވަމުން، ފުލުހުންގެ އިންޓެގްރިޓީ ހިފަހައްޓާ، އަޚްލާޤީ ގޮތުން ރަނގަޅު ހަރުދަނާ ބަޔަކަށް ވުމަށް އަޒުމް ކަނޑައެޅުމަށް ސީޕީ ގޮވާލެއްވިއެވެ. އަދި ޑިއުޓީ ގަޑިތަކާއި އެނޫން ގަޑިތަކުގައިވެސް ރިވެތި އަޚްލާޤާއި ސުލޫކު ހިފަހައްޓާ، ރިވެތި ބަހުން މުޢާމަލާތުކުރާ ބަޔަކަށް ވުމަށް އެންމެހައި ފުލުހުންނަށް ގޮވާލެއްވިއެވެ.

ރޭގެ ރަސްމިއްޔާތުގައި ޖުމްލަ 171 އޮފިސަރުން ވަނީ ދަސްވެނިވެފައެވެ. އޭގެ ތެރޭގައި 39 އަންހެން އޮފިސަރުން ހިމެނެއެވެ. ފުލުހުންގެ ޚިދުމަތަކީ ރައްޔިތުންގެ އިތުބާރު ހިފޭ، ފަންނީ ގޮތުންނާއި ޢުމްރާނީ ގޮތުން ކުރިއަރާފައިވާ ޚިދުމަތަކަށް ހެދުމަށް މަސައްކަތްކުރައްވާ ކަމަށް ސީޕީ ޝުޖާއު ވިދާޅުވިއެވެ.