މިއަދަކީ މަސްވެރި އާއިލާ ތަކަށް ވަރަށް އުފާވެރި ދުވަހެއް: ޝިޔާމް

މިއަދަކީ މަސްވެރި އާއިލާ ތަކަށް ވަރަށް އުފާވެރި ދުވަހެއް ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ޝީޔާމް، ޓްވިޓާގައި މިހެން ވިދާޅުވީ މާދަމާ އިން ފެށިގެން މަސްވެރިން ކިރާ މަހަށް 48 ގަޑިއިރުގެ ތެރޭ ފައިސާ ލިބޭނެ އިންތިޒާމު ހަމަޖެހިގެން ދާނެ ކަމަށް ރައީސް ޑރ. މުއިއްޒު އިއުލާން ކުރެއްވުމާ ގުޅުވައިގެންނެވެ.

ޝިޔާމް ވިދާޅުވީ ރައީސް ގެންދަވަނީ އެމަނިކުފާނުގެ ވައުދުފުޅުތައް ރަނުން ރަނަށް ފުއްދަވައި ދެއްވަމުން ކަމަށެވެ.

އެގޮތުން މަސްވެރިންނަށް ދޭން ޖެހޭ ހުރިހާ ފައިސާއެއް ދައްކައި ހަލާސް ކުރައްވައި، އެމަނިކުފާނުގެ ވައުދުފުޅާ އެއްގޮތަށް މަސްވެރިން މަސް ކިރުވާތާ 48 ގަޑިއިރުގެ ތެރޭގައި ފައިސާ ލިބޭނެ އިންތިޒާމު ހަމަޖައްސައި ދިނުމީ ރައީސް މަސްވެރިންގެ ކަން ކަމަށް ދެއްވައި އަހައްމިއްޔަތު ދައްކުވައިދޭ އަލިގަދަ ހެއްކެއް ކަމަށް ޝިޔާމް ވިދާޅުވި އެވެ.

މަސްވެރިން މިފްކޯ އަށް ކިރާ މަހަށް ގިނަ ވެގެން 48 ގަޑިއިރުގެ ތެރޭގައި މާދަމާ އިން ފެށިގެން ދެން ފައިސާ ޖަމާވަމުންދާނެ ކަން ރައީސް މުއިއްޒު އިއުލާން ކުރެއްވީ ކ. ގާފަރަށް ވަޑައިގެން އެ ރަށު ރައްޔިތުންނާ ބައްދަލުކުރައްވާ ރޭ ދެއްކެވި ވާހަކަފުޅުގަ އެވެ.

މަސްވެރިން މިފްކޯއަށް ކިރާ މަހަށް އެންމެ ގިނަވެގެން ވެސް 48 ގަޑިއިރުގެ ތެރޭގައި ފައިސާ ޖަމާކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ.