ރައީސް ވައުދުވި ގޮތަށް، މަސްވެރިންނަށް 48 ގަޑިއިރު ތެރޭ ފައިސާ ދެނީ

ބޭންކް އޮފް މޯލްޑިވްސް (ބީއެމްއެލް)ގައި އެކައުންޓް ހުޅުވާފައި ހުރި މަސްވެރިންނަށް މާދަމައިން ފެށިގެން 48 ގަޑިއިރު ތެރޭ ފައިސާ ޖަމާކުރަން ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު އިޢުލާންކުރައްވައިފިއެވެ.

މިއީ ރައީސްގެ ރިޔާސީ ވައުދުފުޅެއް ފުއްދުމަށް އެޅުއްވި ފިޔަވަޅެކެވެ.

ރައީސް ވިދާޅުވެފައިވަނީ ބީއެމްއެލްގައި އެކައުންޓް ހުޅުވާފައިވާ މަސް ދޯނިތަކުން މަސް ކިރާތާ 48 ގަޑިއިރު ތެރޭ ފައިސާ ޖަމާކުރަން ބީއެމްއެލާ އެކު އެއްބަސްވުމެއްގައި ސޮއިކޮށްފައިވާ ކަމަށެވެ. އަދި މިހާތަނަށް މަސްވެރިންނަށް ނުދެވި ހުރި 38 މިލިއަން ރުފިޔާ ވެސް މިއަދު ޖަމާކޮށްފައިވާ ކަމަށް ވިދާޅުވިއެވެ.

މީގެ އިތުރުން، ރައީސް އިޢުލާންކުރެއްވި ގޮތުގައި މާދަމައިން ފެށިގެން މާލެ އަތޮޅު ހިންމަފުށި، އައްޑޫ ސިޓީ ހުޅުމީދޫ، ކޫއްޑޫ އަދި ފެލިވަރުން މަސްވެރިންނަށް އެސްޓީއޯ ރޭޓުގައި ތެޔޮ ގަންނަން ލިބޭނެއެވެ. މި ޚިދުމަތް ލިބޭނީ އެ ތަންތަނުގައި ހުންނަ ފިއުލް ސަޕްލައި މޯލްޑިވްސް (އެފްއެސްއެމް)ގެ އައުޓްލެޓްތަކުންނެވެ.

ރައީސް އިތުރަށް ވިދާޅުވެފައިވަނީ އިސްލާމިކް ބޭންކް (އެމްއައިބީ)ގައި އެކައުންޓް ހުޅުވާފައި ހުރި މަސް ދޯނިތަކަށް ވެސް 48 ގަޑިއިރު ތެރޭ ފައިސާ ޖަމާކުރެވޭނެ ގޮތެއް ހޯދުމުގެ މަސައްކަތް ކުރަމުން އަންނަ ކަމަށެވެ. އަދި 2025 ނިމޭއިރު މުޅި ރާއްޖޭގައި އެސްޓީއޯ ރޭޓުގައި ތެޔޮ ލިބޭނެ ކަމަށް ވިދާޅުވިއެވެ.

މަސްވެރިންގެ ކަންބޮޑުވުންތަކަށް އަޑުއަހައި، އެ ކަންކަން ހައްލުކުރުމަށް ސަރުކާރުން މަސައްކަތްކުރަމުންދާ ކަމަށް ރައީސް ފާހަގަކުރެއްވިއެވެ. މަސްވެރިންނަށް ފައިސާ ލިބުމުގައި ދިމާވާ ލަސްތަކަކީ އެ ފަރާތްތަކުގެ އެންމެ ބޮޑު އެއް ކަންބޮޑުވުން ކަމަށްވާތީ، މި ފިޔަވަޅުތަކަކީ އެކަން ހައްލުކުރުމަށް އެޅުއްވި މުހިންމު ފިޔަވަޅުތަކެކެވެ.