ބަނގުރޫޓުވިޔަ ނުދިނުމަކީ އެންމެ ބޮޑު ކާމިޔާބީ: ރައީސް މުއިއްޒު

ރައީސުލްޖުމުހޫރިއްޔާ މިހާރު ކުރައްވަމުން ގެންދަވާ ދަތުރުފުޅުގެ ތެރެއިން / ފޮޓޯ: ރައީސް އޮފީސް

ފާއިތުވި އަހަރު ތެރޭ ހޯދުނު އެންމެ ބޮޑު ކާމިޔާބަކީ ދިވެހިރާއްޖެއަށް ދިމާވެފައި އޮތް މާލީ ހާލަތުން އަރައިގަނެ، ބަނގުރޫޓުވިޔަ ނުދީ ހިފެހެއްޓުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ އއ. އަތޮޅަށް ކުރައްވާ ރަސްމީ ދަތުރުފުޅުގެ ތެރެއިން ރަސްދޫ ރައްޔިތުންނާ މުޚާތަބުކުރައްވާ ވާހަކަފުޅު ދައްކަވަމުންނެވެ،

ރައީސް ވިދާޅުވީ އިގުތިސާދު ސަލާމަތްކޮށް، ސަލާމަތުގެ އައްސޭރިއަށް ގެންދިއުމަކީ މިދިޔަ އަހަރު ކުރެވުނު އެންމެ ބޮޑު ކަންތައް ކަމަށެވެ. އަދި މިއީ ފެންނަން ނެތް ނަމަވެސް ވަރަށް ގިނަ މަސައްކަތްތަކެއް ކޮށްގެން ހާސިލުކުރެވުނު ކަމެއް ކަމަށް އެ މަނިކުފާނު ފާހަގަކުރެއްވިއެވެ.

ކުރިއަށް އޮތް އަހަރުތަކުގައި ވެސް ގައުމު ކުރިއަށް ގެންދާނީ މި އަހަރު ގާއިމުކުރި ބިންގަލުގެ މަތީގައި ކަމަށް ރައީސް ވިދާޅުވިއެވެ. އަދި ތަރައްގީއަކީ ހަމައެކަނި ލޯކުރިމަތިން ފެންނަން ހުންނަ އިމާރާތްތައް ނޫން ކަމަށާއި، މުޖުތަމައުގެ އިޖުތިމާއީ މައްސަލަތަކަށް ހައްލު ހޯދުމަކީ ވެސް މުހިންމު ކަމެއް ކަމަށް އެ މަނިކުފާނު ފާހަގަކުރެއްވިއެވެ.

ރައީސް މުއިއްޒު ވިދާޅުވީ އަންނަ އަހަރުން ފެށިގެން ރައްޔިތުންނަށް ތަރައްގީ ފެންނަން ފަށާނެ ކަމަށެވެ. އެގޮތުން ސިއްހީ، ކުޅިވަރު، އަދި ތައުލީމީ ދާއިރާތަކާއެކު ހުރިހާ ދާއިރާއެއް ވެސް ތަރައްގީވާނެ ކަމަށް އެ މަނިކުފާނު ވިދާޅުވިއެވެ. އަދި މަސްތުވާތަކެއްޗާއި ބިދޭސީންގެ މައްސަލަތަކަށް ވެސް ހައްލު ހޯދާނެ ކަމުގެ ޔަގީންކަން ދެއްވިއެވެ.

ރައީސް ޑރ މުޙައްމަދު މުޢިއްޒު