ކުރިއަށް އޮތް ދެ އަހަރަކީ ވައުދުތައް ފުއްދުމުގެ ޢަމަލީ މަސައްކަތް ފެންނާނެ ދެ އަހަރު: ރައީސް

ކުރިއަށް އޮތް ދެއަހަރަކީ ރައްޔިތުންނަށް ވެވަޑައިގެންފައިވާ ވަޢުދުތައް ފުއްދުމުގެ މަސައްކަތް ޢަމަލީގޮތުން ފެންނާނެ ދެއަހަރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، އއ.އަތޮޅަށް ކުރައްވާ ދަތުރުފުޅުގެ ތެރެއިން އެއަތޮޅު ތޮއްޑުއަށް ވަޑައިގެން ދެއްކެވި ވާހަކަފުޅުގައެވެ.

ތޮއްޑޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ އެންމެ މުހިންމު އެއް ސިޔާސަތަކީ ރައްޔިތުންނާ ވީހާވެސްގާތުން ޚިދުމަތް ދިނުންކަމަށެވެ. އަދި ތޮއްޑޫއަކީ މަސައްކަތްތެރި އަދި މުރާލި ރައްޔިތެއް ދިރިއުޅޭ ރަށެއްކަން ފާހަގަކުރައްވަމުން ވަނީ ދަނޑުވެރިކަމާއި ފަތުރުވެރިކަން ކުރިއަރަމުން އަންނަ ރަށެއްކަމަށް ވިދާޅުވެފައެވެ.

ރައީސް ވިދާޅުވީ ސަރުކާރުން އިސްކަންދޭނީ ދަނޑުވެރިކަމާއި ފަތުރުވެރިކަމުގެ ސިނާއަތްތައް ކުރިއެރުވުމަށްކަމަށެވެ. އަދި ތޮއްޑޫ ކައުންސިލުން ލޯކަލް ކައުންސިލް އޮތޯރިޓީ ކުންފުންޏެއް އުފައްދާފައި އޮތުމުން، ކައުންސިލާ ގުޅިގެން ރައްޔިތުންގެ ފުދުންތެރިކަން އިތުރުކުރަން ބޭނުންވާ މަޝްރޫޢު ހިންގަން ފުރިހަމަ އެއްބާރުލުން ސަރުކާރުން ދެއްވާނެކަމުގެ ޔަޤީންކަން ދެއްވިއެވެ.

ތޮއްޑޫގެ މަގުތަކުގެ ޙާލަތު ވަރަށްބޮޑަށް ގޯސްކަން ފާހަގަކުރައްވަމުން ރައީސް ވިދާޅުވީ ރައްޔިތުން ބޭނުންވާގޮތަށް މަގުތައް އަންނަ އަހަރު ތަރައްޤީކޮށްދެއްވާނެކަމަށެވެ. މީގެ އިތުރުން އަންނަ އަހަރުގެ ބަޖެޓްގެ ތެރޭން ތޮއްޑޫގެ ސިއްޙީ މަރުކަޒުގެ ޚިދުމަތް ފުޅާކުރެވިގެންދާނެ ކަމުގެ ޔަޤީންކަންވެސް ރައީސުލްޖުމްހޫރިއްޔާ ތޮއްޑޫގެ ރައްޔިތުންނަށް ދެއްވިއެވެ.

ރައީސުލްޖުމްހޫރިއްޔާ ވިދާޅުވީ 2025 ވަނަ އަހަރާއި 2026 ވަނަ އަހަރު ވެގެންދާނީ ރިޔާސީ އިންތިޚާބުގައި އެމަނިކުފާނު ވީ ވަޢުދު ފުއްދުމަށްޓަކައި އަމަލީގޮތުން އެމަސައްކަތް ހިނގާދާނެ އަހަރުތައްކަމަށެވެ. އަދި މިކަންކަން ކުރިއަށް ގެންދާނީ މުޅިރާއްޖޭގެ ހުރިހާ ކަންކޮޅެއްގައި ބަހާލެވިގެން ތަރުތީބެއްގެ ތެރޭންކަމަށްވެސް އެމަނިކުފާނު ވިދާޅުވިއެވެ.