ސޫރިޔާގެ އިދިކޮޅު ހަނގުރާމަވެރިން ވެރިރަށް ހިފުމާއެކު ރައީސް ބައްޝާރު ފިއްލަވައިފި

ސޫރިޔާގެ އިދިކޮޅު ހަނގުރާމަވެރިން ރޭ ފަތިހު ވެރިރަށް ދިމިޝްގަށް އެރުމާއެކު، ސޫރިޔާގެ ރައީސް ބައްޝާރުލް އަސަދާއި އޭނާގެ އާއިލާ ސޫރިޔާ ދޫކޮށް ފިއްލަވައިފިއެވެ.

މި ޚަބަރު ވަނީ އަލްޖަޒީރާ، ރޮއިޓާސް އަދި ރަޝިޔާގެ ޓާސް ނޫސް އެޖެންސީން ކަށަވަރުކޮށްދީފައެވެ.

އިދިކޮޅު ހަނގުރާމަވެރިން ވަނީ ރޭ ފަތިހު ވެރިރަށް ދިމިޝްގަށް ވަދެ، ސޫރިޔާގެ ރަސްމީ ޓީވީ، ރޭޑިއޯ އަދި ސަރުކާރުގެ ބައެއް އިމާރާތްތައް ހަނގުރާމައަކާ ނުލައި އެމީހުންގެ ކޮންޓްރޯލްގެ ދަށަށް ގެންގޮސްފައެވެ. ސޫރިޔާގެ ރިޔާސަތަށް ހިމާޔަތްދޭ ސިފައިންގެ ސްޕެޝަލް ފޯސްގެ ދެ އޮފިސަރަކު ރޮއިޓާސްއަށް ދެއްވި ބަޔާނެއްގައި ވިދާޅުވެފައިވަނީ ސިފައިންގެ ހިމާޔަތުގައި ރައީސް ބައްޝާރާއި އޭނާގެ އާއިލާ މަތިންދާ ބޯޓެއްގައި ސޫރިޔާ ދޫކުރައްވައި ފިއްލަވައިގެން ވަޑައިގެންފައިވާ ކަމަށެވެ.

ސޫރިޔާގެ އިދިކޮޅު ހަނގުރާމަވެރިން މީގެ ދިހަވަރަކަށް ދުވަސް ކުރިން ވަނީ ކުއްލި ގޮތަކަށް ގިނަ އަދަދެއްގެ ޒަމާނީ ހަތިޔާރާއި ހަނގުރާމައިގެ ވަސީލަތްތައް ބޭނުންކޮށްގެން ސޫރިޔާގެ އުތުރުގެ ބޮޑު ދެ ޕްރޮވިންސް ކަމަށްވާ އިދްލިބްއާއި ހަލަބް އެމީހުންގެ ކޮންޓްރޯލްގެ ދަށަށް ގެނެސްފައެވެ. އޭގެ ފަހުން އެމީހުން ވަނީ ހަމާ އަދި ހިމްސް ޕްރޮވިންސްތައްވެސް ހިފާފައެވެ.

ބައްޝާރަށް ހިމާޔަތް ދޭނެކަމަށް މުހައްލިލުން ދެކެނީ ރަޝިޔާ، އީރާން އަދި ޔުނައިޓެޑް އަރަބް އިމަރޭޓްސް (ޔޫއޭއީ) މި ތިން ގައުމުންނެވެ. ނަމަވެސް ބައްޝާރު ހިމާޔަތް ހޯއްދެވުމަށް އިޚްތިޔާރު ކުރެއްވި ގައުމެއް އަދި ސާފުވެފައެއް ނުވެއެވެ.

ސޫރިޔާގެ އިދިކޮޅު ލީޑަރަކަށް މިހާރު ހުރީ ކުރިން ޖަބްހަތުއްނުސްރާގެ ވެރިއަކަށް ހުރި އުމުރުން 42 އަހަރުގެ އަބޫމުހައްމަދުލް ޖޫލާނީ (އަހްމަދުއްޝަރުއު) އެވެ. އޭނާ ވަނީ ބައްޝާރުގެ ވެރިކަމުގެ ނިޒާމުގައި ބައިވެރިވި އެއްވެސް ފަރާތަކުން އޭނާއާ ދެކޮޅަށް ނުނުކުންނަ ނަމަ އެމީހަކަށް ރައްކަކަށް ރައްކާތެރިކަން އޮންނާނެކަމަށް ވިދާޅުވެފައެވެ. މިކަމުން ޖޫލާނީ މަސައްކަތް ކުރަނީ މަސްރަހު ފިނިކުރުމަށް ކަމަށް ބެލެވެއެވެ.