ސީރިއާގެ ވެރިރަށް ދިމިޝްގަށް ހަނގުރާމަވެރިން ވަންނަން ފަށައިފި

ސީރިއާ ސަރުކާރާ ދެކޮޅު ހަނގުރާމަވެރިން އެ ގައުމުގެ ވެރިރަށް ދިމިޝްގަށް ވަންނަން ފަށާފައިވާ ކަމަށް އިއުލާނުކޮށްފި އެވެ.

މި ކުރިއެރުމާއެކު، ރައީސް ބައްޝާރުލް އަސަދުގެ ސަރުކާރުގެ ހިމާޔަތަށް ދިމިޝްގު ބޭރުގައި ސަލާމަތީ ކަންތައް ބަލަހައްޓަމުން ދިޔަ ހިޒްބުﷲގެ ހަނގުރާމަވެރިން ވެސް އެ ސަރަހައްދު ދޫކޮށް ގޮސްފައިވާ ކަމަށް ވަނީ ރިޕޯޓުކޮށްފައެވެ.

ހަނގުރާމައިގެ ހާލަތު ވަޒަންކުރަމުން އަންނަ ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުނެފައިވަނީ ސީރިއާ ސިފައިން ދިމިޝްގުގެ އެއާޕޯޓް ވެސް މިހާރު ދޫކޮށްލާފައިވާ ކަމަށެވެ. މީގެ އިތުރުން، އެ ޖަމިއްޔާގެ މޮނިޓަރުން ފާހަގަކޮށްފައިވަނީ ދިމިޝްގުގައި ހުންނަ، އަނިޔާވެރިކަން ބޮޑު "ސައީދަންޔާ" ޖަލުގެ ދޮރުތައް ވެސް މިހާރު ހުރީ ހުޅުވާލައިފައި ކަމަށެވެ.

އޭއެފްޕީއާ ވާހަކަ ދެއްކި ދިމިޝްގުގެ ބައެއް އާންމުން ބުނެފައިވަނީ އެ މީހުންނަށް މިހާރު ބަޑީގެ އަޑު ވެސް އިވޭ ކަމަށެވެ. މި ހާދިސާއާ ގުޅިގެން، ސީރިއާގެ އިންޓީރިއާ މިނިސްޓަރު މުހައްމަދު އައްރަހްމޫން ވިދާޅުވެފައިވަނީ "ސަލާމަތީ ގޮތުން އަދި އަސްކަރީ ގޮތުން ވަރަށް ވަރުގަދަ ހުރަހެއް" ވެރިރަށުގެ ވަށައިގެން ގާއިމުކޮށްފައިވާ ކަމަށާއި "މި ދިފާއީ ފާރު ފަހަނަޅައި ދިއުމަކީ އެއްވެސް މީހަކަށް ކުރެވޭނެ ކަމެއް ނޫން" ކަމަށެވެ.

މިދިޔަ މަހުގެ ފަހު ހަފުތާއިން ފެށިގެން ސީރިއާގެ ހަނގުރާމަވެރިން ބޮޑެތި ކުރިއެރުންތައް ހޯދަމުން އަންނަ ކަމަށާއި، މުހިންމު އެތައް ސިޓީއެއް މިހާރު ވަނީ ހިފައިފައި ކަމަށް ވަނީ ރިޕޯޓުކޮށްފައެވެ. މީގެ ތެރޭގައި ހިމްސް ސިޓީ ވެސް ހިމެނޭ ކަމަށް ވަނީ އިއުލާނުކޮށްފައެވެ.

ސީރިއާގެ ވެރިކަމުން ބައްޝާރު ދުރުކުރުމަށް 2011 ވަނަ އަހަރު ފެށި މުޒާހަރާތައް ރޫޅާލުމަށް ބާރުގެ ބޭނުންކުރުމާ އެކު އުފެދުނު ދާހިލީ ހަނގުރާމައިގެ ސަބަބުން މިހާތަނަށް 500،000 އަށް ވުރެ ގިނަ މީހުން ސީރިއާގައި ވަނީ މަރުވެފައެވެ. މި ހޭދަވި ދިގު މުއްދަތުގެ ތެރޭގައި ހަނގުރާމަވެރިން ދުވަހަކު ވެސް މިހާ ބޮޑު ކުރިއެރުމެއް ހޯދައިފައެއް ނުވާ ކަމަށް ވަނީ ފާހަގަކޮށްފައެވެ.