ޒިންމާދާރު ދަރިންތަކެއް ބިނާކުރުމަށް އަޒުމް ކަނޑައަޅަން ޖެހޭ: ރައީސް މުއިއްޒު
ރައީސް ޑރ. މުޙައްމަދު މުއިއްޒު -- ފޮޓޯ/ ރައީސް އޮފީސް
ގައުމު ދެކެ ލޯބިވާ، ގައުމީވަންތަ، ޒިންމާދާރު ކުދިންތަކެއް ބިނާކުރުމަށް ޓަކައި މިއަދު އަޒުމް ކަނޑައަޅަން ޖެހޭކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ މާފަންނު މަދަރުސާގެ 40ވަނަ އަހަރީ ދުވަސް ފާހަގަކުރުމަށް މިއަދު ހަވީރު ބޭއްވި ޖަލްސާގައެވެ.
ރައީސް ވިދާޅުވީ މާފަންނު މަދަރުސާގެ ތުއްތު ދަރިވަރުންނަކީ މާދަމާ ގައުމުގެ ކަންކަމުގައި ހަވާލުވެ ތިބޭނެ ހުނަރުވެރި ކުދިން ކަމަށެވެ. އަދި ރަނގަޅު ބިންގަލެއްގައި އެ ކުދިން ބޮޑުވާ މަންޒަރު ފެނުމަކީ ލިބިވަޑައިގަންނަވާ ހިތްވަރެއްކަމަށް ވެސް ވިދާޅުވިއެވެ.
އިސްލާމްދީނުގެ ވަރުގަދަ އަގީދާގެ މަތީގައި ތިބި، ދިވެހި ގައުމުދެކެ ލޯބިވާ، ގައުމިއްޔަތުގެ ރޫހު ފުރިހަމައަށް އަށަގަނެފައިވާ ދަރިންތަކެއް ބިނާކުރުމަށް ގައުމީ ވިސްނުމެއްގައި މަސައްކަތް ކުރުމަކީ މިއަދު އަޒުމް ކަނޑައަޅަންޖެހޭ ކަމެއް ކަމަށް ރައީސް ވިދާޅުވިއެވެ.
މި ފެށޭ އަހަރު މާފަންނު މަދަރުސާގައި ފަސޭހައިން ބޭނުންކުރެވޭނެހެން އާ ހޯލެއް ބިންމަތީގައި ތަރައްގީ ކޮށްދޭނެ ކަމަށް ރައީސް ވަނީ އިއުލާނުކުރައްވާފައެވެ. އަދި ސަރުކާރުން މާފަންނު މަދަރުސާގެ ކުރިއެރުމަށް ކޮށްދެވެން ހުރި ކަންކަން ކޮށްދެއްވާނެ ކަމުގެ ޔަގީންކަން ވެސް ދެއްވިއެވެ.
ކޮމިއުނިޓީ ސްކޫލުތަކަކީ ވަރަށް މުހިންމު ތަންތަން ކަމަށް ރައީސް ވިދާޅުވިއެވެ. މި ފަދަ ސްކޫލުތަކަށް ބޭނުންވާ ކަންކަން ފަހިކޮށްދިނުމަށް ސަރުކާރާ ގުޅިގެން މަސައްކަތްކުރުމަށް ކައުންސިލްތަކަށް އިރުޝާދު ދެއްވިއެވެ. އަދި އެޑިއުކޭޝަން މިނިސްޓްރީން ސެން ޓީޗަރުން ތަމްރީނުކުރުމަށް އާ ޕްރޮގްރާމެއް ފެށުމަށް ތައްޔާރުވަމުންދާ ކަމަށް ވެސް ރައީސް ވިދާޅުވިއެވެ.
ކޮމެންޓް