އާޓިފިޝަލް ބީޗުގައި މާރާމާރީ ހިންގި ބިދޭސީންނަށް ފިޔަވަޅު އަޅަނީ

އާޓިފިޝަލް ބީޗުގައި މާރާމާރީ ހިންގި ބިދޭސީންނާ މެދު ފިޔަވަޅު އެޅުމުގެ މަސައްކަތް ކުރަމުން އަންނަ ކަމަށް އިމިގްރޭޝަން ކޮންޓްރޯލަރު، މުޙައްމަދު ޝަމްއާން ވަހީދު ވިދާޅުވެއްޖެ އެވެ.

މިއަދު އިރު އޮއްސުނު ވަގުތު އާޓިފިޝަލް ބީޗަށް ގިނަ އަދަދެއްގެ މީހުން ޖަމާވެފައިވަނިކޮށް، އެ މާރާމާރީ ހިންގާފައި ވަނީ އެ ތަނަށް ގޮސް އުޅުނު އިންޑިއާ ބައެއްގެ މެދުގަ އެވެ.

ޝަމްއާން އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ އެ މާރާމާރީގައި ޝާމިލުވި ހުރިހާ ފަރާތްތައް ދެނެގަތުމުގެ މަސައްކަތް ކުރަމުންދާ ކަމަށާއި އެ މީހުންނަށް ފިޔަވަޅު އަޅާނެ ކަމުގެ ޔަގީންކަން އަރުވާ ކަމަށެވެ.

"މިއަދުގެ އިރުއޮއްސުނު ވަގުތު އާޓިފިޝަލް ބީޗު ސަރަހައްދުގައި މާރާމާރީ ހިންގާ އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ ޓާސްކު ފޯހުން މިހާރު ބަލަމުންދާ ވާހަކަ އެންމެހާ ފަރާތްތަކުގެ މައުލޫމާތަށް ޓަކައި ދަންނަވަން" ޝަމްއާން ވިދާޅުވި އެވެ.

އެ މާރާމާރީ ހިންގި ވަގުތު އެ ސަރަހައްދުގައި ހުރި ކުޑަކުއްޖެއްގެ ގައިގައި ޖެހި، އަނިޔާވުމުން ވަނީ އެ ކުއްޖާ ބެލެނިވެރިޔާ އެކަމާ ރުޅިވެރިކަން ފައުޅުކޮށްފަ އެވެ. އަދި ފުލުހަށް ވެސް އެ މައްސަލަ ރިޕޯޓު ކުރި އެވެ.

އެކަމަކު، އެ ސަރައްހަދަށް ފުލުހުން އައުމުގެ ކުރިން އެ މާރާމާރީ ހިންގި މީހުން ވަނީ އެތަނުން ފިލައިގެން ގޮސްފަ އެވެ.