މާރަންދޫގެ ފެނާއި ނަރުދަމާގެ މަސައްކަތް ނިންމާލައިފި

ހއ. މާރަންދޫ ފެނާއި ނަރުދަމާގެ ނިޒާމު ގާއިމު ކުރުމުގެ ޢަމަލީ މަސައްކަތްނިންމައި ކޮމިޝަން ކޮށްފި އެވެ.

ހއ. މާރަންދޫގެ ފެނާއި ނަރުދަމާ ނިޒާމް ކޮމިޝަން ކުރުމުގެ މަސައްކަތް ކުރިޔަށް ގެންދިޔައީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ، ފެނަކަ އަދި އެމްޑަބްލިޔުއެސްސީގެ ބޭފުޅުން އެރަށަށް ވަޑައިގެންނެވެ.

މި މަސައްކަތުގެ ދަށުން އެމްޑަބްލިޔުއެސްސީން ވަނީ ފެން ޕްލާންޓް ބެހެއްޓުމަށް އިމާރާތް ކުރާ ފެސިލިޓީ ބިލްޑިންގު ގާއިމްކޮށް، ފެން ހޮޅީގެ މައިނެޓްވޯޯކް އަޅައި ގޭގެޔަށް ފެނުގެ ކަނެކްޝަން ގުޅައިދީފަ އެވެ.

މީގެ އިތުރުން، ފެން އުފެއްދުމަށް ޓަކައި ބޯހޯލް ތޮރުފައި އަދި ރިޖެކްޓް ލައިންވެސް އަޅާފައިވާއިރު، ފެން ރައްކާ ކުރުމަށް ޓަކައި ފެންތާނގީ ވެސް ވަނީ ބަހައްޓާފަ އެވެ.

މާރަންދޫ ނަރުދަމާ ނިޒާމް ގާއިމް ކުރުމުގެ މަސައްކަތުގެ ދަށުން، ނަރުދަމާގެ މައި ނެޓްވޯކް އާއި ޕަމްޕިން ލައިން އަޅައި، ޕަމްޕިން ސްޓޭޝަން ގާއިމުކޮށް، ސީ އައުޓްފޯލް ވަނީ އަޅާފަ އެވެ. އަދި ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ގުޅައިދީފައިވެ އެވެ.

މީގެއިތުރުން މި މަޝްރޫއުގެ ދަށުން ފެން ތަހުލީލު ކުރުމަށް ބޭނުންވާ ސަމާނާއި އަދި ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ވެހިކަލް ފޯރުކޮށްދޭނެ އެވެ.

މާރަންދޫގެ ފެނާއި ނަރުދަމާ މަޝްރޫއަކީ ކޮންސްޓްރަކްޝަން މިނިސްޓްރީން އެމްޑަބްލިޔުއެސްސީ އާ ހަވާލު ކޮށްގެން ކުރިޔަށްގެންދާ މަޝްރޫއެކެވެ.

މިމަޝްރޫއުގެ ޖުމުލަ އަގަކީ 73.98 މިލިއަން ދިވެހި ރުފިޔާ އެވެ.

އެމްޑަބްލޔުއެސްސީން ބުނީ މިމަޝްރޫއުގެ ސަބަބުން މާރަންދޫގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބިގެންދާނެ ކަމަށެވެ.