މާލެ-ހުޅުމާލެ ފެނުގެ ނިޒާމް ގުޅާލާ އަންނަ އަހަރު ހިދުމަތް ދޭން ފަށަނީ

މާލެއާއި ހުޅުމާލޭގެ ފެނުގެ ނިޒާމު ގުޅާލުމުގެ މަސައްކަތް އަންނަ އަހަރުތެރޭ ނިންމާލެވޭނެ ކަމަށް މާލެ ވޯޓާ އެންޑް ސުވަރޭޖް ކޮމްޕެނީ، އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލްމަތީން މުޙައްމަދު ވިދާޅުވެއްޖެ އެވެ.

އެމްއެމްޓީވީގައި ރޭ ވާހަކަދައްކަވަމުން މަތީން ވިދާޅުވީ މާލެއާއި ހުޅުމާލެއާ ދެމެދު ޓްރާންސްފާ ޕަމްޕް ސްޓޭޝަން ގާއިމް ކުރުމަށް ޓަކައި ސިނަމާލެ ބުރިޖް ހެދިއިރު ޕައިޕްލައިން ގާއިމް ކޮށްފައި ވާކަމަށާއި، ނަމަވެސް މިއަދާ ހަމައަށްވެސް އެ ހޮޅި އޮތީ ނުގުޅުވާ ކަމަށެވެ.

"ޑރ. މުއިއްޒު ހައުސިން މިނިސްޓަރު ކަމުގައި އަދި ޔާމީންގެ ރައީސް ކަމުގެ ދުވަސްވަރުގަ ބުރިޖު ނިންމާ ހޮޅި އޮތީ އެޅިފަ. މާލެެ އާއި ހުޅުމާލެ އާ ގުޅާލަން. ފަސް އަހަރު ހަމަވިއިރު އެ ހޮޅީގެ ދެ ކޮޅު ނުގުޅި އެ ދިޔައީ. އަޅުގަނޑުމެންނާ ހަވާލުވިއިރު ވެސް އެ މަސައްކަތް އޮތީ ހުއްޓިފަ. ދެން އެކި ސަބަބުތަކާ ހުރެ،" މަތީން ވިދާޅުވި އެވެ.

"އެހެންވީމަ މި އަންނަ އަހަރުގެ ކުރީ ކޮޅު މާލެ އާއި ހުޅުމާލޭގެ ފެނުގެ ވިއުގަ ގުޅިގެން ދާނެ. އެ މަސައްކަތް ނިމި ހިދުމަތް ދޭން ފަށާނެ،"

މަތީން ވިދާޅުވީ މިއީ މުހިންމު ޕްރޮޖެކްޓެއް ކަމަށާއި، ޕްރޮޖެކްޓުގެ މަސައްކަތް ނިމުމުން މާލެއާ ހުޅުމާލެއާ ދެމެދު ގަޑިއަކު 800 ޓަނުގެ ފެން ފޯރުކޮށްދެވޭނެ ކަމަށެވެ.

މި މަޝްރޫއުގެ މަސައްކަތް މިދިޔަ ފަސް އަހަރު ތެރޭގައި ނިންމާނުލެވި އޮތުމުގެ ކަންބޮޑުވުން ފައުޅު ކުރައްވާ މަތީން ވިދާޅުވީ ފެނުގެ ވިއުގަ ގުޅާލުމުގެ މަސައްކަތަކީ އެކުންފުނިން އެންމެ ބޮޑު އިސްކަމެއް ދީގެން ކުރިއަށްގެންދިޔުމަށް ރާވާފައިވާ މަސައްކަތް ކަމަށެވެ.

އެމްޑީ ވިދާޅުވީ ފެން އުފެއްދޭ މިންވަރު އިތުރު ކުރުމަށާއި އެ ފެން ރައްކާ ކުރެވޭ މިންވަރު އިތުރު ކުރުމަށް ވެސް މަސައްކަތް ކުރަމުން އަންނަ ކަމަށެވެ.

އެގޮތުން ހުޅުމާލޭގައި ފެން ރައްކާ ކުރުމުގެ ގާބިލުކަން ދެ ގުނައަށް އިތުރުކޮށް އަދި ފެން އުފެއްދޭ ނިސްބަތް 30 އިންސައްތަ އިތުރު ކުރުމުގެ މަސައްކަތް ކުރަމުން އަންނަ ކަމަށާއި އެހެންވެ، އަންނަ އަހަރު ތެރޭގައި އެކަން ވެސް ނިންމާލެވޭނެ ކަމަށް މަތީން ވިދާޅުވި އެވެ.

ބުރިޖު މެދުވެރިކޮށް، މާލެ އާއި ހުޅުމާލޭގެ ކަރަންޓާއި ފެނުގެ ނިޒާމާއި އަދިވެސް އިތުރު ނެޓްވޯކްތަކެއް ގުޅާލާނެ އެވެ.