ފުލުހުން ރައްޔިތުންނާ ގުޅުން ބަދަހިކުރުމަށް "ފުލުހަކާއެކު ކޮފީއެއް" ޕްރޮގްރާމް ފަށައިފި

ފުލުހުން ކުރިއަށް ގެންދާ ޕްރޮގްރާމުގެ ތެރެއިން/ ފޮޓޯ: ޕޮލިސް

ރައްޔިތުންނާއެކު ގުޅުން ބަދަހިކުރުމަށް "ފުލުހަކާއެކު ކޮފީއެއް" ގެ ނަމުގައި ޕްރޮގްރާމެއް ފުލުހުންގެ އިދާރާއިން ފަށައިފިއެވެ.

މި ޕްރޮގްރާމްގެ ފުރަތަމަ ބައްދަލުވުން އިއްޔެ ހަވީރު ހުޅުމާލެ ފޭސް ދޭއްގައި ބޭއްވުނެވެ.

ފުލުހުންގެ އިދާރާއިން ބުނެފައިވަނީ މި ބައްދަލުވުމުގައި ގިނަ ބައެއްގެ ބައިވެރިވުން ލިބި، ހުޅުވިގެންވާ މާހައުލެއްގައި ފުލުހުންނާއެކު މުހިންމު މަޝްވަރާތަކެއް ކުރެވުނު ކަމަށެވެ. އަދި މިފަދަ ހަރަކާތްތަކަކީ ރައްޔިތުންގެ އިތުބާރު ހޯދައި، ގުޅުން ބަދަހިކުރުމަށް އެޅޭ މުހިންމު ފިޔަވަޅުތަކެއް ކަމަށް ފުލުހުން ވިދާޅުވިއެވެ.

ފުލުހުންގެ އިދާރާއިން ބައްދަލުވުމުގައި ބައިވެރިވެ ވަޑައިގެންނެވި އެންމެހާ ފަރާތްތަކަށް ޝުކުރު އަދާކޮށްފައިވެއެވެ. ފުލުހުން އަބަދުވެސް ރައްޔިތުންނާ ގާތުން އެކި މަސައްކަތްތަކެއް ކުރާ ކަމަށާއި، މި މަޖުތަމަޢު ރައްކާތެރިތަނަކަށް ހެދުމަށް ތަފާތު އޮޕަރޭޝަންތައް ހިންގައި ޚިދުމަތްތައް ގާތުން ދިނުމުގެ މަސައްކަތްތައް ވެސް ފުލުހުން ދަނީ ކުރަމުންނެވެ.

މި ޕްރޮގްރާމަކީ ފުލުހުންނާއި ރައްޔިތުންނާ ދެމެދު އޮންނަ ގުޅުން އިތުރަށް ބަދަހިކޮށް، ދެފަރާތުގެ މެދުގައި އިތުބާރު އުފެއްދުމަށް އަމާޒުކޮށްގެން ކުރިއަށް ގެންދާ ޕްރޮގްރާމެކެވެ. މިފަދަ ބައްދަލުވުންތަކުން ރައްޔިތުންގެ ކަންބޮޑުވުންތަކާއި ޚިޔާލުތައް ފުލުހުންނާ ހިއްސާކުރުމުގެ ފުރުސަތު ލިބިގެންދާނެއެވެ.

ފުލުހުން