މެލޭޝިޔާގެ ފެންބޮޑުވުމާ ގުޅިގެން ބަލިމަޑުކަމުގެ ބިރު އުފެދިއްޖެ

މެލޭޝިޔާއަށް ކުރި ވިއްސާރައިގައި އެ ޤައުމުގެ އުތުރުގެ ސްޓޭޓްތަކުގެ ގިނަ ސަރަޙައްދުތަކެއްގައި ފެންބޮޑުވުމާ ގުޅިގެން، ފެނުގެ ޒަރީއާއިން ފެތުރޭ ނުރައްކާތެރި ބަލިތައް ޢާންމުވެދާނެ ކަމުގެ ބިރު އުފެދިއްޖެއެވެ.

ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ އެ ޤައުމުގެ އިރުއުތުރު އައްސޭރިފަށުގައި އޮތް ކެލަންތަން ސްޓޭޓަށެވެ.

މެލޭޝިޔާގެ ސަރުކާރުން އެންމެ ފަހުން ހާމަކޮށްފައިވާ މަޢުލޫމާތަށް ބަލާއިރު، 40,000އަށްވުރެ ގިނަ ރައްޔިތުން އަދިވެސް ދިރިއުޅެމުން ދަނީ ވަގުތީ ހިޔާތަކުގައެވެ. މެލޭޝިޔާގެ މޫސުމާ ބެހޭ އިދާރާއިން ބުނީ، ކުރިއަށް އޮތް ދުވަސްތަކުގައި ވެސް އެ ޤައުމުގެ އުތުރުގެ ސަރަޙައްދުތަކަށް ވިއްސާރަ ކުރާނެ ކަމަށް ބެލެވޭ ކަމުގައެވެ.

ކެލަންތަންގައި ފެނުގެ ޒަރީއާއިން ފެތުރޭ ނުރައްކާތެރި ބަލިތައް މިހާރު ވެސް ފެތުރެމުންދާ ކަމުގައި އެ ސްޓޭޓްގެ އިދާރާތަކުން ހާމަކުރިއެވެ. ބަނޑުގައި ރިހުމާއި، ނޭވާލާ ނިޒާމުގެ ބަލިތަކުގެ އިތުރުން ހަމުގެ ބަލިތައް ޖެހިގެން    5,000 އަށްވުރެ ގިނަ މީހުންނަށް މިހާރު ވެސް ފަރުވާ ދެމުންދާ ކަމަށް ބުނެއެވެ.

މެލޭޝިޔަން މެޑިކަލް ރިޕީފް ސޮސައިޓީ (މަރސީ)ން ބުނީ، ފެނުގެ ޒަރީއާއިން ފެތުރޭ ބަލިތައް ޖެހިފައިވާ މީހުންނަށް ފަރުވާ ދިނުމަށް މި ވަގުތު ގޮންޖެހުންތަކެއް ކުރިމަތިވެފައި ނެތް ނަމަވެސް، ބަލި ޖެހޭ މީހުންގެ އަދަދު އިތުރުވެއްޖެ ނަމަ، ބޮޑެތި ދަތިތަކާ ކުރިމަތިލާން ޖެހޭނެ ކަމުގައެވެ. މަރސީގެ އިސް އޮފިޝަލެއް ކަމުގައިވާ ޝާޙް ފައިޞަލް ޙުސައިން ވިދާޅުވީ ގައިންތާހިރުވުމަށް ބޭނުންވާ ސާމާނު ސްޓޮކު ކޮށްފައިވާ ކަމަށާއި، ވަގުތީ ހިޔާތަކުގައި ތިބި ކުޑަކުދިންނަށް ޞިއްޙީ ފަރުވާގެ ޚިދުމަތްތައް ފޯރުކޮށްދިނުމަށް އިސްކަންދީފައިވާނެ ކަމަށެވެ.

މެލޭޝިޔާގެ މޫސުމާ ބެހޭ އިދާރާއިން ބުނީ، ޑިސެންބަރު 8 އާއި 14 އާ ދެމެދު، އެ ޤައުމުގެ އުތުރުގެ ސަރަޙައްދުތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމުގައެވެ. އަދި ބޯނިޔޯ އައިލެންޑްސްގައި ހިމެނޭ ސަބާއާއި ސަރަވަކްގެ ސަރަޙައްދުތަކަށް ވެސް މޫސުން ގޯސްވާނެ ކަމަށް ލަފާ ކުރެވޭ ކަމުގައި އިންޒާރު ދީފައިވެއެވެ.