ރާއްޖޭގައި އިންވެސްޓްކުރުމުގެ ލައިސަންސް ދޫކުރަން ފަށައިފި

އަލަށް ޢަމަލުކުރަން ފެށި ފޮރިން އިންވެސްޓްމެންޓް ޤާނޫނުގެ ދަށުން ރާއްޖޭގައި އިންވެސްޓްކުރުމުގެ ލައިސަންސް ދޫކުރުމުގެ މަސައްކަތް އިޤްތިޞާދީ ވުޒާރާއިން ފަށައިފިއެވެ.

މި ޤާނޫނުގެ ދަށުން ރާއްޖޭގައި އިންވެސްޓް ކުރެވޭނީ އިޤްތިޞާދީ ވުޒާރާއިން ދޫކުރާ ފޮރިން އިންވެސްޓްމެންޓް ލައިސަންސް ލިބިގެންނެވެ.

މިދިޔަ ސެޕްޓެމްބަރު މަހުގެ 3 ވަނަ ދުވަހު ރައީސުލްޖުމްހޫރިއްޔާ ތަސްދީޤުކުރެއްވި މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ އެ ބިލު ތަސްދީޤުކޮށް ގެޒެޓް ކުރާތާ 3 މަސް ދުވަހުގެ ތެރޭގައެވެ. މި ޤާނޫނުގެ ދަށުން އިންވެސްޓްކުރުމުގެ ހުއްދަ ހޯދުމަށް އެދި ހުށަހަޅަންޖެހެނީ އިޤްތިޞާދީ ތަރައްޤީއާބެހޭ ވުޒާރާއަށެވެ.

އިންވެސްޓްކުރުމުގެ ހުއްދަ ހޯދުމުގެ މަރުހަލާތަކުގެ ތެރޭގައި، އިންވެސްޓްކުރަން ޝައުޤުވެރިވާ ފަރާތްތަކުން އެކަމަށް އެދި ހުށަހެޅުމާއި، ޝަރުތު ފުރިހަމަވާ ފަރާތްތަކަށް އިޢުތިރާޟެއް ނެތްކަމުގެ ލިޔުން ވުޒާރާއިން ދިނުމާއި، އިންވެސްޓްކުރާ ފަރާތުގެ ވިޔަފާރި ރަޖިސްޓްރީކުރުން ހިމެނެއެވެ. މީގެ އިތުރުން، ފޮރިން އިންވެސްޓްމެންޓް ލައިސަންސް ވުޒާރާއިން ދޫކުރުމާއި، ފޮރިން އިންވެސްޓަރާއި އިޤްތިޞާދީ ވުޒާރާއާ ދެމެދު އެއްބަސްވުމުގައި ސޮއިކުރުން ހިމެނެއެވެ.

ފޮރިން އިންވެސްޓްމަންޓް ޤާނޫނުގެ މަޤުޞަދަކީ ދިވެހިރާއްޖޭގައި ކުރެވޭ ބޭރުގެ އިންވެސްޓްމަންޓްތައް އިތުރުކޮށް، އިންވެސްޓްމަންޓްތައް މެދުވެރިކޮށް ފޮރިން ކެޕިޓަލާއި، ޓެކްނޮލޮޖީއާއި ޢިލްމާއި ހުނަރު ގެނައުމަށް ފަހި މާޙައުލެއް އުފެއްދުމެވެ. މި ޤާނޫނުގައި، ދިވެހިރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާގުޅޭ އުސޫލުތަކާއި، އިންވެސްޓަރުންނަށް ލިބިދެވޭނެ ޙިމާޔަތާއި ރައްކާތެރިކަމާގުޅޭ އުސޫލުތައް ބަޔާންކޮށްފައިވެއެވެ.

މި އާ ޤާނޫނާއެކު އިންވެސްޓަރުން ރާއްޖެއަށް ކުރާ އިތުބާރު އިތުރުވެ، ބޭންކްތަކުންނާއި މާލީ އިދާރާތަކުން ފައިސާގެ އެހީ ލިބުމަށް އިތުރަށް މަގުފަހިވެގެންދާނެކަމަށް ސަރުކާރުން ބުނެއެވެ. މިއީ 1979 ގައި އެކުލަވާލެވުނު ކުރީގެ ޤާނޫނަށް 45 އަހަރު ފަހުން ގެނެވުނު ޒަމާނީ ބަދަލެކެވެ.