ބިދޭސީއަކަށް ވަޅިން ހަމަލާދީ، ފޭރުނު މީހަކު "ވާނުވާ" ބަންދަން، އިތުރު މީހަކު ހޯދަނީ

ބިދޭސީއަކަށް ވަޅިން ހަމަލާ ދީ އޭނާގެ ފޯނު ފޭރުނު މައްސަލާގައި ހައްޔަރު ކުރި މީހާގެ ބަންދަށް "ވާނުވާ" ޖަހިފި އެވެ.

މިމައްސަލައިގެ ތުހުމަތުގައި ހައްޔަރުކޮށްފައި ވަނީ ހއ. މާރަންދޫ، އުތުރުގެ، އިބްރާޙީމް މުޙައްމަދު އެވެ.

ފުލުހުން ބުނީ ހުޅުމާލެ ދެ ވަނަ ފޭހުގެ ހިތިގަސްމަގުން ބިދޭސީއަކަށް ވަޅިން ހަމަލާ ދީ މާރާމާރީ ހިންގައި އޭނާގެ ފޯނު ފޭރުނު މައްސަލައެއް އިއްޔެ ރިޕޯޓުކޮށްފައިވާ ކަމަށެވެ.

މި މައްސަލައާ ގުޅިގެން ވަޅިން ހަމަލާދީ، ފޭރުނު މީހާ ހޯދުމަށް ސީސީޓީވީ ފުޓޭޖް، ބަލައި، ދެނެގަނެ ހަމަ އެ ދުވަހުގެ ވަގުތެއްގައި އެމީހާ ހައްޔަރުކޮށްފައިވާ ކަމަށް ފުލުހުން ބުންޏެވެ.

އޭނާގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް މިއަދު ހާޒިރު ކުރުމުން ތަހުގީގު މަރުހަލާ ނިމެންދެން ބަންދު ކުރަން އަމުރުކޮށްފައިވެ އެވެ.

ހަމައެއާ އެކު މި މައްސަލައާ ގުޅިގެން އިތުރު މީހަކު ހޯދުމުގެ މަސައްކަތް ކުރަމުން އަންނަ ކަމަށް ވެސް ފުލުހުން މައުލޫމާތު ދީފައިވެ އެވެ.

ވާނުވާ ބަންދަކީ ޝަރީއަތް ނިމެންދެން ޖަހާ ބަންދު މުއްދަތެވެ. އިބްރާޙީމް މިއަދު ބަންދުކޮށްފައި އެ ވަނީ ޝަރީއަތް ނިމެންދެނެވެ.