ސްޓެލްކޯގެ މުވައްފަޒުން މަސައްކަތުގައި ދައްކާ ނަމޫނާ ފާހަގަކޮށް ކުޑަކުދިންގެ ހަވީރެއް

ސްޓޭޓް އިލެކްޓްރިކް ކޮމްޕެމެނީ ލިމިޓެޑް (ސްޓެލްކޯ) އިން މާދަމާ ކުޑަކުދިންގެ ހަވީރެއް ބާއްވަން ނިންމާފައިވާ ކަމަށް އެ ކުންފުނިން މިއަދު ބުނެފި އެވެ.

ތަފާތު ގޭމް ތަކާއި މެސްކޮޓުގެ އިތުރުން ތަފާތު ހަރަކާތްތަކާ އެކު ސްޓެލްކޯ ބިޒްނަސް ސެންޓަރު އިމާރާތުގައި މި ކުޑަކުދިންގެ ހަވީރު ކުރިއަށް ގެންދާނީ ހުކުރު މާދަމާ ހަވީރު 4:00 އިން 6:00 އަށް އަދި ރޭގަނޑު 8:00 އިން 9:30 އަށެވެ.

ސްޓެލްކޯއިން ބުނީ ވޭތުވެދިޔަ ހަ މަސްދުވަހު އެ ކުންފުނީގެ މުވައްޒަފުން ވަރަށް ބުރަކޮށް މަސައްކަތްކޮށް، ސްޓެލްކޯ ބިޒްނަސް ސެންޓަރު އިމާރާތް ކުރުމުގެ މަސައްކަތް ވަރަށް ފުރިހަމަ އަށް ނިންމާފައިވާ ކަމަށެވެ.

އެހެންވެ، މިއީ އެ މުވައްޒަފުންގެ ހިތްވަރާއި ޖޯޝާއި މަސައްކަތުގެ ނަމޫނާ އަހުލާގު ފާހަގަކޮށް، އެ މުވައްޒަފުންގެ ހުނަރުވެރިކަން އެ މުވައްޒަފުންގެ އާއިލާ ތަކަށް ދައްކާލުމާއި އެ އާއިލާ ތަކުގެ ކުޑަކުދިންގެ އިތުރުން ހުރިހާ ކުޑަކުދިންނަށް ހުޅުވާލައިގެން ބާއްވާ ހާއްސަ ކުޑަކުދިންގެ ހަވީރެއް ކަމަށް ސްޓެލްކޯއިން ބުންޏެވެ.