ހައިބްރިޑް ހަނގުރާމައިން ދިފާޢުވުމަށް ރައީސް ނައިބު ގޮވާލައްވައިފި

މިއަދުގެ ހަނގުރާމަތަކުގައި ބޭނުންކުރާ ހައިބްރިޑް ހަތިޔާރުތަކާއި ކައްޗަރީ ވިސްނުމުގެ ނުރައްކަލުން ދިފާޢުވުމަށް ޒުވާނުން ތައްޔާރުވުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފު ގޮވާލައްވާފިއެވެ.

މި އަހަރުގެ ހުރަވީ ދުވަހުގެ މުނާސަބަތުގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން، ނައިބު ރައީސް ވިދާޅުވީ 21 ވަނަ ޤަރުނުގެ ތަހުޒީބާއި ތަމައްދުންގެ އުކުޅުތަކާއި ގޮތްތައް ދަސްކުރުމަށް ކޮންމެ ދިވެއްސަކަށްވެސް އިލްތިމާސްކުރައްވާ ކަމަށެވެ.

ކައްޗަރީ ހަނގުރާމައިގެ ނުފޫޒުތަކުން ޤައުމުގެ އިޖުތިމާޢީ ބިންގަލަށް ލިބޭ ގެއްލުންތަކުގެ ވާހަކަ ދައްކަވަމުން، ނައިބު ރައީސް ވިދާޅުވީ މިފަދަ ހަމަލާތަކުން ޤައުމުގެ އެއްބައިވަންތަކަމާއި އިޤްތިޞާދީ ހަމަޖެހުމަށް ގެއްލުންވެ، ދޮގު މަޢުލޫމާތު ފެތުރިގެންދާ ކަމަށެވެ.

އަދުގެ ޒުވާން ޖީލަކީ މާދަމާގެ ނަމޫނާ ޖީލަކަށް ވާންޖެހޭ ކަމަށް ވިދާޅުވަމުން، ނައިބު ރައީސް ގޮވާލެއްވީ ޤައުމީ ތަރައްޤީއަށް ބޭނުންވާ ލަނޑުދަނޑިތައް ޙާޞިލުކުރުމަށް ޒުވާނުން މަސައްކަތްކުރުމަށެވެ.

ސަރުކާރުން ސައިބަރ ސަލާމަތީ ފިޔަވަޅުތައް ހަރުދަނާކުރަމުންދާ ކަމަށް ފާހަގަކުރައްވަމުން، ނައިބު ރައީސް ވިދާޅުވީ ހައިބްރިޑް ހަނގުރާމައިން ދިފާޢުވުމަށް އަދިވެސް ގިނަ ކަންކަން ކުރަން ޖެހިފައިވާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރު ވިސްނުންފުޅާއެކު ޤައުމީ މަސްލަހަތަށްޓަކައި ކުރައްވަމުންދާ މަސައްކަތްޕުޅުތަކަށް ނައިބު ރައީސް ޝުކުރު ދަންނަވާ، ދިވެހި ޤައުމަށް ޓަކައި ޤުރުބާންވެވަޑައިގެންނެވި ޤައުމީ ބަޠަލުންނަށް ހެޔޮ ރަޙުމަތްލެއްވުމަށް އެދި ދުޢާ ދެންނެވިއެވެ.