ރައީސް ވިދާޅުވި އަދަދަށް ސިޔާސީ މުއައްޒަފުން ވަކިކޮށްފައިވާކަށް ކަށަވަރުކޮށްދެއްވައިފި

ސަރުކާރުގެ ޚަރަދުތައް ކުޑަކުރުމަށް ކުރަމުންގެންދާ މަސައްކަތުގެ ދަށުން މިހާތަނަށް ސިޔާސީ 228 މުވައްޒަފަކު ވަކިކޮށްފައިވާކަން ރައީސުލްޖުމްހޫރިއްޔާގެ އޮފީހުން ޔަގީންކޮށްދީފިއެވެ.

މި މަޢުލޫމާތު ހާމަކޮށްފައިވަނީ މަޢުލޫމާތު ހޯދައި ލިބިގަތުމުގެ ޤާނޫނުގެ ދަށުން އަމިއްލަ ފަރާތަކުން ހުށަހެޅި ސުވާލަކަށް ޖަވާބު ދިނުމުގެ ގޮތުންނެވެ.

ރައީސް އޮފީހުން ފޮނުވި ޖަވާބު ލިޔުމުގައި ބުނެފައިވަނީ، މި ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން މިއަހަރުގެ އޮކްޓޯބަރުމަހުގެ 31 ވަނަ ދުވަހުގެ ނިޔަލަށް ސިޔާސީ 228 މުވައްޒަފަކު މަޤާމުން ވަކިކޮށްފައިވާ ކަމަށެވެ. ނަމަވެސް، ވަކިކުރެވުނު މުވައްޒަފުންގެ ނަންތަކާއި އެފަރާތްތައް މަސައްކަތްކުރި ވުޒާރާތަކުގެ މަޢުލޫމާތު ދޫކުރުމަށް އިންކާރުކޮށްފައިވެއެވެ.

ރައީސް އޮފީހުން އިތުރަށް ބުނެފައިވަނީ، ވަކިކުރެވުނު މުވައްޒަފުންގެ މަޤާމުތަކުގެ ނަންތަކާއި ވަކިކުރެވުނު އަދަދުގެ ތަފްސީލު، އަދި މުވައްޒަފުން ވަކިކުރުމުގެ ސަބަބުން ދައުލަތުގެ ބައިތުލްމާލުން ސަލާމަތްކުރެވޭނެ އަދަދު ރައީސުލްޖުމްހޫރިއްޔާގެ އެކްސް ޕޯސްޓްތަކުން ފެންނާނެ ކަމަށެވެ.

ސަރުކާރުގެ ޚަރަދުތައް ކުޑަކުރުމުގެ ގޮތުން ސިޔާސީ 200 އަށްވުރެ ގިނަ މީހުން ވަޒީފާއިން ވަކިކުރުމަށް ރައީސް ޑރ. މުޙައްމަދު މުޢިއްޒު ނިންމެވީ އޮކްޓޯބަރުމަހުގެ 15 ވަނަ ދުވަހުއެވެ. މި ނިންމުމުގެ ދަށުން ވަކިކުރެވުނު މުވައްޒަފުންގެ ތެރޭގައި 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުން ހިމެނެއެވެ.