ސްރީލަންކަން އެއާލައިންސް އައްޑޫސިޓީ ގަމަށް ކުރާ ދަތުރުތައް އިތުރުކުރަނީ

ސްރީލަންކަން އެއާލައިންސްއިން އައްޑޫސިޓީ ގަމަށް ކުރާ ދަތުރުތައް އިތުރުކުރުމަށް ނިންމައިފިއެވެ.

މިކަން ހާމަކުރައްވާފައި ވަނީ ސްރީލަންކަން އެއާލައިންސްގެ ރާއްޖޭގެ އެޖެންޓް، އޭސް އޭވިއޭޝަންގެ މެނޭޖިންގ ޑިރެކްޓަރ މުޙައްމަދު ފިރާޤެވެ.

ފިރާޤް ވިދާޅުވިގޮތުގައި، މި މަހުގެ 19 ވަނަ ދުވަހުން ފެށިގެން އައްޑޫސިޓީ ގަމަށް ކުރާ ދަތުރުތައް އިތުރުކުރުމަށް ވަނީ ނިންމާފައެވެ. މިހާރު ހަފްތާއަކު ދެ ފަހަރު ބާއްވަމުންދާ ދަތުރުތައް، ޑިސެމްބަރު 19 އިން ފެށިގެން ހަފްތާއަކު ތިން ފަހަރަށް އިތުރުކުރާނެއެވެ.

އައު ތާވަލާ އެއްގޮތަށް، ސްރީލަންކަން އެއާލައިންސްގެ ފުލައިޓްތައް އައްޑޫސިޓީ ގަމަށް ދަތުރުކުރާނީ ބުރާސްފަތި، ހޮނިހިރު އަދި އަންގާރަ ދުވަހުއެވެ. މި ބަދަލު ގެނައުމުގެ މައިގަނޑު މަޤްޞަދަކީ ދުނިޔޭގެ އެކި ކަންކޮޅުތަކުން އައްޑޫސިޓީއަށް ދަތުރުކުރަން ބޭނުންވާ ފަތުރުވެރިންނަށް އިތުރު ފުރުޞަތުތަކެއް ހޯދައިދިނުމެވެ.

ސްރީލަންކަން އެއާލައިންސްއަކީ އައްޑޫސިޓީއަށް އެންމެ ދިގު މުއްދަތަކަށް މެދުކެނޑުމެއްނެތި ދަތުރުތައް ކުރަމުން އަންނަ ބައިނަލްއަޤްވާމީ އެއާލައިނެވެ. ނަމަވެސް ކޮވިޑް-19 ގެ ބަލިމަޑުކަމާ ގުޅިގެން، އައްޑޫސިޓީ ގަމަށް ކުރާ ދަތުރުތައް ހަފްތާއަކު އެއް ފަހަރަށް މަދުކުރަން ޖެހުނެވެ.

ކުރިއަށް އޮތީ ރާއްޖޭގެ ފަތުރުވެރިކަމުގެ މޫސުމް ކަމަށްވާތީ، ރާއްޖޭގެ އެކި ސަރަޙައްދުތަކަށް އަންނަ ފްލައިޓްތަކުގެ އަދަދު އިތުރުވާނެ ކަމަށް ޓޫރިޒަމް މިނިސްޓްރީން ލަފާކުރެއެވެ. މިގޮތުން، ސްރީލަންކަން އެއާލައިންސްގެ މި ނިންމުމަކީ އައްޑޫސިޓީގެ ފަތުރުވެރިކަން ކުރިއެރުވުމަށް ލިބޭނެ ބޮޑު ހިތްވަރެއް ކަމުގައި ބެލެވެއެވެ.