ހިޔާ ފްލެޓްތަކުގައި ލިފްޓް ހަރު ކުރަން މިހާތަނަށް 18 މިލިއަން ޑޮލަރު ޚަރަދު ކޮށްފި: ފަޒުލް

ހުޅުމާލޭ ދެވަނަ ފިޔަވަހީގައި ހުރި ހިޔާ ފްލެޓް ތަކުގައި އިތުރު ލިފްޓް ހަރު ކުރަށް މިހާތަނަށް 18 މިލިއަން ޑޮލަރު (278 މިލިއަން ރުފިޔާ) ޚަރަދު ކޮށްފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.

ހިޔާ ފްލެޓް ތަކުގައި އިތުރު ލިފްޓު ހަރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވައުދުފުޅެކެވެ.

ރައްޔިތުންގެ މަޖިލީހުގެ މާލިއްޔަތު ކޮމެޓީގައި މިއަދު ވާހަކަދައްވަމުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ، ހިޔާގެ 16 ޓަވަރުގައި ހަރުކުރުމަށް 32 ލިފްޓު ގަތުމަށް 18 މިލިއަން ޑޮލަރު ޚަރަދު ކޮށްފައިވާ ކަމަށެވެ.

މި އަހަރަށް ލަފާކޮށް ފާސް ކުރި ބަޖެޓުގައި އެކަމަށްޓަކައި ހިމަނާފައި ވަނީ ވަނީ 200 މިލިއަން ރުފިޔާ އެވެ.

ލިފްޓު ހަރުކުރުމުގެ މަސައްކަތް ހަވާލުކޮށްފައި ވަނީ ޗައިނާގެ ޝެންޔަންގް ޔުއާން އިންޓެލެކްޗުއަލް ގުރޫޕާ އެވެ.

ރައީސް މުއިއްޒު ވިދާޅުވެފައި ވަނީ މިހާރު ހަރު ކުރަމުން އަންނަ ލިފްޓް ތަކުގެ ތެރޭގައި ސްޓްރެޗާ އެރުވޭ ލިފްޓް ހުންނާނެ ކަމަށާއި މި މަޝްރޫއު އެކީ ނިމޭއިރު ބަލިމީހުން އުފުލުމުގެ ކަންކަމަށް ދާއިމީ ހައްލު ލިބޭނެ ކަމަށެވެ.