ކުލީ ބިންތަކުން އެޗްޑީސީއަށް ލިބެންޖެހޭ 226 މިލިއަން ރުފިޔާ ހޯދައިފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެކި ފަރާތް ތަކަށް ވިޔަފާރި ބޭނުމަަށް ކުއްޔަށް ދޫކޮށްފައިވާ ބިން ތަކަށް ލިބެން ޖެހޭ 1.4 ބިލިއަން ރުފިޔާގެ ތެރެއިން 226 މިލިއަން ރުފިޔާ މިހާތަނަށް ހޯދާފައިވާ ކަމަށް އެ ކުންފުނިން މިއަދު ބުނެފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު ވާހަކަދައްކަވަމުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ އޭނާ އެ ކުންފުންޏާ ހަވާލުވިއިރު، ކުންފުންޏަށް ލިބެން ޖެހޭ ބިލިއަނަކަށް ވުރެ ގިނަ ހުރި ކަމަށެވެ.

މަގާމާ ހަވާލުވެވަޑައިގެންނެވި ފަހުން އެ ފައިސާ ހޯދުމަށް މަސައްކަތްތަކެއް ކުރައްވާފައިވާކަން ފަޒުލް ފާހަގަކުރެއްވި އެވެ.

އެގޮތުން އެ ފައިސާ އަނބުރާ ހޯދުމަށް ސީދާ އޭނާގެ ބެލުމުގެ ދަށުން ވަކި ރިކަވަރީ ކޮމިޓީއެއް އުފައްދައިގެން މަސައްކަތް ކުރަމުންދާ ކަމަށް ވިދާޅުވި އެވެ.

ފަޒުލް ވިދާޅުވީ އެ ކޮމެޓީގެ ބުރަ މަސައްކަތުން ނުލިބި ހުރި ފައިސާގެ ތެރެއިން 226 މިލިއަން ރުފިޔާ މިހާރު ހޯދާފައިވާ ކަމަށެވެ.

"އަޅުގަނޑުމެން އިނިޝިއަލީ އެ މަސައްކަތް ފަށައިގަތްއިރު ޖުމުލަ 1.4 ބިލިއަން ނުލިބި އޮތްއިރުގައި މިއަދު އެ ރިކަވަރީ ކޮމިޓީގެ މަސައްކަތުން 226 މިލިއަން ރިކަވާކޮށްފިން،" ފަޒުލް ވިދާޅުވި އެވެ.

އޭނާ ފާހަގަ ކުރެއްވި ގޮތުގައި ކުންފުންޏަށް އެކި ގޮތް ގޮތުން ލިބެން ޖެހޭ ފައިސާގެ އަދަދު 14 ބިލިއަން ރުފިޔާ އަށް އަރަ އެވެ. އަދި އެ އަދަދު އެހައި ބޮޑަށް އިތުރުވީ އެ ފައިސާ ހޯދުމަށް އެކަށީގެންވާ މަސައްކަަތް ތަކެއް އޭރު ކުރެވިފައި ނެތުމުން ކަމަށް ވިދާޅުވި އެވެ.

ކުލި ނުދައްކައި ފަރާތްތަކުގެ އެއްބަސްވުން ބާތިލުކޮށް އެޗްޑީސީން އަންނަނީ އެ ފަރާތް ތަކަށް ނޯޓިސް ފޮނުވަމުންނެވެ.

އެ ނޯޓިސްއަށް އިޖާބަ ނުދޭ ފަރާތްތަކާމެދު ފިޔަވަޅު އެޅުމަށް އެ މައްސަލަތައް ކޯޓަށް ހުށަހަޅަމުންދާ ކަމަށް ވެސް އެމްޑީ ފަޒުލް ވިދާޅުވި އެެވެ.