އެޗްޑީސީއަށް ލިބެންޖެހޭ 1.4 ބިލިޔަން ރުފިޔާގެ ތެރެއިން 226 މިލިޔަން ރުފިޔާ ހޯދައިފި

ވިޔަފާރީގެ ބޭނުމަށް އެޗްޑީސީން ދޫކޮށްފައިވާ ތަންތަނުން އެކުންފުންޏަށް ލިބެންޖެހޭ ފައިސާގެ ތެރެއިން މިހާތަނަށް 226 މިލިޔަން ރުފިޔާ ހޯދާފައިވާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޟުލް ރަޝީދު ވިދާޅުވެއްޖެއެވެ.

މިކަން ހާމަކޮށްފައި ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީގައި މެންބަރުން ދެންނެވި ސުވާލުތަކަށް ޖަވާބުދެއްވަމުންނެވެ.

ފަޟުލް ވިދާޅުވިގޮތުގައި އައު މެނޭޖްމަންޓް ކުންފުންޏާ ހަވާލުވިއިރު އެކި ފަރާތްތަކަށް އެޗްޑީސީން ދޫކޮށްފައިވާ ބިމާއި އިމާރާތްތަކުން ޖުމްލަ 1.4 ބިލިޔަން ރުފިޔާ އެ ކުންފުންޏަށް ނުލިބި ހުއްޓެވެ. މީގެ ތެރޭގައި ލީސްގެ ގޮތުގައި ނުލިބިހުރި 699 މިލިޔަން ރުފިޔާ އާއި ޑިވެލޮޕްމަންޓް އެންޑް ސޭލްސްގެ ގޮތުގައި ލިބެންޖެހޭ 720 މިލިޔަން ރުފިޔާ ހިމެނެއެވެ.

މި މައްސަލަ ހައްލު ކުރުމަށް ކުންފުނީގައި ރިކަވަރީ ކޮމިޓީއެއް އުފައްދާފައިވާ ކަމަށާއި، އެ ކޮމިޓީން ކުރެއްވި މަސައްކަތުން މިހާތަނަށް 226 މިލިޔަން ރުފިޔާ އަނބުރާ ހޯދިފައިވާކަމަށް ފަޟުލް ވިދާޅުވިއެވެ. އަދި އެޗްޑީސީއަށް ޖުމްލަ ގޮތެއްގައި އެކި މުއައްސަސާތައް ހިމެނޭހެން 14 ބިލިޔަން ރުފިޔާ ނުލިބިހުރި ކަމަށާއި، މި ފައިސާ ހޯދަން މީގެ ކުރިން މަސައްކަތް ކުރެވިފައިނުވާ ކަމަށްވެސް ފާހަގަކުރެއްވިއެވެ.

ކުންފުންޏަށް ލިބެންޖެހޭ ފައިސާ ހޯދުމަށް އެކި ފަރާތްތަކާއެކު ވެފައިވާ އެއްބަސްވުން ބާތިލުކުރުމަށް ނިންމާފައިވާ ކަމަށާއި، އޭގެ ކުރިން ފައިސާ ދެއްކުމަށް އަންގައި، ފައިސާ ދައްކައި ޚަލާސް ކުރަން ބޭނުންވާ ފަރާތްތަކަށް ވަކި މުއްދަތެއްގެ ތެރޭގައި ފައިސާ ދެއްކުމުގެ ފުރުސަތުވެސް ދެމުން އަންނަކަން ފަޟުލް ފާހަގަކުރެއްވިއެވެ.

ފައިސާ ނުދައްކާނަމަ އެފަރާތަކަށް ދީފައިވާ އިމާރާތް ނުވަތަ ބިން އަތުލުމަށް ކޯޓު މަރުހަލާއަށް ދިއުމަށްވެސް ނިންމާފައިވާކަމަށް އެޗްޑީސީގެ މެނޭޖިން ޑިރެކްޓަރު އިބްރާހީމް ފަޟުލް ރަޝީދު ވިދާޅުވިއެވެ. މި މަސައްކަތްތަކުގެ ސަބަބުން އެޗްޑީސީއަށް ލިބެންޖެހޭ ގިނަ ފައިސާތަކެއް އަނބުރާ ހޯދޭނެކަމަށް އުންމީދުކުރެވެއެވެ.