ބަލިމީހާގެ މަޢުލޫމާތު ހާމަކުރުމުން އެންސްޕާއިން މާފަށް އެދިއްޖެ

އެންސްޕާގެ ސިއީއޯ ހީނާ ވަލީދު

ބަލިމީހެއްގެ އެހީގެ ތަފްސީލް ހާމަކުރެވުނީތީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާއިން) މައާފަށް އެދެފިއެވެ.

އެންސްޕާއިން މައާފަށް އެދިފައިވަނީ އެ އެޖެންސީން އެހީ ނުދިންކަމަށް ބުނެ ސޯޝަލް މީޑިއާގައި ދޮގުމައުލޫމާތު ފެތެރުމާއި ގުޅިގެން އެންސްޕާއިން ނެރުނު ބަޔާނާއި ގުޅިގެން ނެރުނު ނޫސްބަޔާނެއްގައެވެ.

އެންސްޕާއިން ނެރުނު ބަޔާނުގައި ބުނެފައިވަނީ ބަލިމީހާގެ ވަނަވަރާ ގުޅޭ އެއްވެސް މަޢުލޫމާތެއް ހާމަނުކުރި ނަމަވެސް، ފަރުވާގެ މަޢުލޫމާތުތައް ހާމަކުރުމަކީވެސް އެންމެ ރަނގަޅު ގޮތް ނޫން ކަމަށް ގަބޫލުކުރާ ކަމަށެވެ. އަދި އެފަދަ މަޢުލޫމާތެއް ހިމެނިފައިވާތީ އެކަމަށް މާފަށް އެދިފައިވެއެވެ.

އެންސްޕާގެ ބަޔާނުގައި ބުނެފައިވަނީ ބަލިމީހާއަށް އެހީ ހޯދަން އެ އެޖެންސީއަށް ނުވަ ފަހަރު ހުށަހަޅާފައިވާ ކަމަށެވެ. މީގެ ތެރޭގައި ފައިސާގެ އެހީ، ޓިކެޓުގެ ޚަރަދު އަދި އާސަންދައިގެ ދަށުން ފަރުވާގެ ޚަރަދު ހަމަޖައްސައިދިން ކަމަށް ބަޔާނުގައި ބުނެފައިވެއެވެ.

މި ހާދިސާއާ ގުޅިގެން ސޯޝަލް މީޑިއާގައި ގިނަ ބަޔަކު ވަނީ އެންސްޕާގެ ޢަމަލަށް ފާޑުކިޔާފައެވެ. ގިނަ ބަޔަކު ފާހަގަކޮށްފައިވަނީ ބަލިމީހުންގެ ޒާތީ މަޢުލޫމާތު ހާމަކުރުމަކީ ޕްރައިވަސީއަށް އަރައިގަތުން ކަމަށާއި، މިފަދަ ކަންކަމުގައި ސަރުކާރުގެ އިދާރާތަކުން އިތުރަށް ސަމާލުވާންޖެހޭ ކަމަށެވެ.

އެންސްޕާއިން މިހާރު ވަނީ މި ކަމަށް މާފަށް އެދި، ކުރިމަގުގައި މިފަދަ ކަންކަން ތަކުރާރުނުވާނެ ކަމަށް ޔަގީންކަން ދީފައެވެ.

އެންސްޕާ