މަލޯކާ އަަތުން މޮޅުވެ ތާވަލުގެ އެއްވަނައިގައި ބާސެލޯނާ ހަމަޖެހިލައިފި

ސްޕެއިންގެ ލަލީގާގައި ރޭ ކުޅުނު މެޗުގައި މަޔޯކާ އަތުން 5-1 ން މޮޅުވެ ބާސެލޯނާ އިން ޕޮއިންޓް ތާވަލުގެ 1 ވަނާގައި ހަމަޖެހިލައިފިއެވެ.  

މިއީ އެންމެ ފަހުން ބާސެލޯނާ ކުޅުނު ހަތަރު މެޗުގެ ތެރެއިން އެ ޓީމު މޮޅުވި ފުރަތަމަ ފަހަރެވެ.

މި މޮޅާއިއެކު ބާސެލޯނާ ވަނީ 16 މެޗުން 37 ޕޮއިންޓާއެކު ތާވަލުގެ އެއްވަނައިގައި 4 ޕޮއިންޓުގެ ލީޑެއް ހޯދާފައެވެ. ދެވަނައިގައި އޮތް ރެއާލް މެޑްރިޑަށް 14 މެޗުން ލިބިފައިވަނީ 33 ޕޮއިންޓެވެ. މަޔޯކާ އަށް 16 މެޗުން 24 ޕޮއިންޓް ލިބި، އެ ޓީމު އޮތީ ތާވަލުގެ 6 ވަނައިގައެވެ.

މަޔޯކާގެ ދަނޑުގައި 22,000 އަށްވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގައި ބާސެލޯނާގެ ފަރާތުން ފުރަތަމަ ލަނޑު ޖެހީ ފެރާން ޓޮރޭޒް އެވެ. ކޯޗު ހެންސީ ފްލިކް ވަނީ ރޮބަޓް ލެވަންޑޯސްކީ އަށް އަރާމު ކުރުމުގެ ފުރުސަތު ދިނުމަށް ޓޮރޭސް އަށް ފުރުސަތު ދީފައެވެ.

ފުރަތަމަ ހާފު ނިމެން ކައިރިވިއިރު މަޔޯކާގެ ވިދާތް މުރިގީ ވަނީ ލަނޑެއްޖަހާ ނަތީޖާ ހަމަހަމަ ކޮށްދީފައެވެ. ނަމަވެސް ދެވަނަ ހާފުގައި ބާސެލޯނާ އިން ވަނީ ހަތަރު ލަނޑު ޖަހާ މެޗު ކާމިޔާބުކޮށްފައެވެ. މީގެ ތެރޭގައި ރަފީނިއާ ޖެހި ދެ ލަނޑާއި، ފްރެންކީ ޑެޖޮންގް އާއި ޕައު ވިކްޓަރ ޖެހި ލަނޑު ހިމެނެއެވެ.