ތައިލެންޑުގެ ސަފީރަކަށް ފުއާދު ހަމަޖައްސަން ރުހުން ދީފި

ފުއާދުގެ ބަޔޮގްރަފީ ނެރުމަށް ރައީސް އޮފީހުގައި ބޭއްވި ރަސްމިއްޔާތުގެ ތެރެއިން -- ފޮޓޯ/ ރައީސް އޮފީސް

ތައިލެންޑުގައި ހުންނަވާ ރާއްޖޭގެ ސަފީރުގެ މަގާމަށް އިލެކްޝަންސް ކޮމިޝަން (އީސީ)ގެ ކުރީގެ ރައީސް ފުއާދު ތައުފީގު ހަމަޖައްސަން މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން ރުހުން ދީފި އެވެ.

މިއަދު ބޭއްވި ކޮމެޓީގެ ބައްދަލުވުމުގައި ފުއާދު އެ މަގާމަށް ހަމަޖައްސަން ރުހުން ދެއްވާފައި ވަނީ ކޮމިޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

ފުއާދުގެ އިލެކްޝަންސް ކޮމިޝަނުގެ މެންބަރުކަމުގެ މުއްދަތު ހަމަވުމާ ގުޅުވައިގެން ރައީސް ޑރ. މުއިއްޒު، އެ މަގާމަށް އޭނާގެ ނަން ހުށަހަޅާފައި ވަނީ ނޮވެމްބަރު މަހުގެ 25ގަ އެވެ.

ފުއާދު، ސަރުކާރަށް ހިދުމަތްކުރައްވަމުން ގެންދަވާތާ މިހާރު 35 އަހަރުވެއްޖެ އެވެ.

ފުއާދަކީ ރާއްޖޭގައި މިހާތަނަށް ބޭއްވި އެންމެ ބޮޑެތި އިންތިހާބު ތަކުގައި އިލެކްޝަންސް ކޮމިޝަންގެ ވެރިއެއްގެ ގޮތުގައި ވަރަށް އިހުލާސްތެރިކަމާ އެކު މަސައްކަތް ކުރެއްވި ބޭފުޅެކެވެ.

އޭގެ ތެރޭގައި 2008 ވަނަ އަހަރު ބޭއްވި ރިޔާސީ އިންތިހާބާއި 2023 ވަނަ އަހަރު ބޭއްވި ރިޔާސީ އިންތިހާބު ފާހަގަކޮށްލެވެ އެވެ.

މަޖިލިސް