އިރުވައި މޫސުމާއެކު ރާއްޖޭގެ ވައި ނުސާފުވެއްޖެ

ރާއްޖޭގެ ވައި ވަނީ ވަރަށް ބޮޑަށް ނުސާފުވެފައި

އިރުވައި މޫސުން ފެށުމާއެކު ރާއްޖޭގެ ވައިގެ ސާފުކަން ދަށަށް ގޮސް، ނޭވާލާ ނިޒާމާއި ފުއްޕާމޭގެ ބަލިތައް ހުންނަ މީހުން ސަމާލުވާންޖެހޭ މިންވަރަށް ވައި ނުސާފުވެއްޖެ ކަމަށް މޫސުމާބެހޭ އިދާރާއިން ބުނެފިއެވެ.

މި ވަގުތު ރާއްޖޭގެ އުތުރާއި މެދު ސަރަޙައްދުގެ ވައިގެ ސާފުކަން ހުރީ 'މޮޑަރޭޓް ލެވެލް' ގައި ކަމަށް ބުނެފައިވާއިރު، މިއީ ނޭވާލާ ނިޒާމާއި ފުއްޕާމޭގެ ބަލިތައް ހުންނަ މީހުން ބޭރަށް ނުކުންނައިރު ސަމާލުވާންޖެހޭ މިންވަރެއް ކަމަށް ވެސް އެ އިދާރާއިން ބުނެފައިވެއެވެ.

މޫސުމާބެހޭ އިދާރާގެ އޮފިޝަލަކު ވިދާޅުވި ގޮތުގައި، ކޮންމެ އަހަރެއްގެ މި ދުވަސްވަރަކީ އިރު އުތުރުން ވައި ޖެހޭ ދުވަސްވަރެއް ކަމަށާއި، އިންޑިއާގެ ސަބް ކޮންޓިނެންޓްގައި އުފެދޭ ހިރަފުހުގެ ސަބަބުން ރާއްޖޭގެ ވައި ނުސާފުވެ، ދުރު ފެންނަ މިންވަރު ދަށްވެއެވެ.

އިރުވައި މޫސުން ފެށުމުން ވައިގެ ނުސާފުކަން އިތުރަށް އިތުރުވާނެ ކަމަށް މޫސުމާބެހޭ އިދާރާއިން ލަފާކުރާ ކަމަށާއި، ޚާއްޞަކޮށް މެދު ރާއްޖެ ތެރެއާއި އުތުރަށް އޭގެ އަސަރު ބޮޑުވާނެ ކަމަށް ވެސް އެ އިދާރާއިން ބުނެފައިވެއެވެ.

މި ޙާލަތުގައި ނޭވާލާ ނިޒާމާއި ފުއްޕާމޭގެ ބަލިތައް ހުންނަ މީހުން ރައްކާތެރިވުމުގެ ގޮތުން މާސްކު ބޭނުންކުރުމަށް އިރުޝާދު ދެވިފައިވެއެވެ. އަދި މި ޙާލަތު ނޮވެމްބަރު މަހުން ފެށިގެން މާރިޗު މަހާ ހަމައަށް ވެސް ދެމިގެންދާނެ ކަމަށް ލަފާކުރެވޭ ކަމަށް މޫސުމާބެހޭ އިދާރާއިން ބުނެފައިވެއެވެ.

ވައިގެ ސާފުކަން ދަށްވުމާ ގުޅިގެން، ޢާންމު ރައްޔިތުން ވެސް ބޭރަށް ނުކުންނައިރު ސަމާލުވުމަށާއި، ވައިގެ ފެންވަރު ދަށްވެފައިވާ ދުވަސްތަކުގައި ވީވަރަކުން ގޭގައި ތިބުމަށް އިރުޝާދު ދެވިފައިވެއެވެ.

މޫސުން