އީރާނުގެ އެހީތެރިކަމާއި އެކު އިރާގުގެ ހަނގުރާމަވެރިން ސޫރިޔާއަށް

އީރާނުގެ އެހީތެރިކަން ލިބިގެން ޢިރާޤުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުގެ ހަނގުރާމަވެރިން ސޫރިޔާއަށް އެތެރެވާން ފަށައިފިއެވެ.

މިއީ ސޫރިޔާގެ ރައީސް ބައްޝާރް އަލް-އަސަދުގެ ސަރުކާރަށް އެހީތެރިކަން ފޯރުކޮށްދިނުމުގެ ގޮތުން އަޅާ ފިޔަވަޅެކެވެ.

މި ފިޔަވަޅު އަޅަން ޖެހުނީ ސޫރިޔާގެ ހުޅަނގު އުތުރުގައި އޮތް ޙަލަބު ޕްރޮވިންސްގައި ހަޔިއަތު ތަޙްރީރް އަލް-ޝާމް (އެޗްޓީއެސް) ޖަމާޢަތުން ދާދިފަހުން ދިން ޙަމަލާތަކާ ގުޅިގެންނެވެ. އެޗްޓީއެސްގެ ހަނގުރާމަވެރިން ވަނީ ޙަލަބު ޕްރޮވިންސްގެ ބޮޑެތި ރަށްތަކަށް އަތްގަދަކޮށް، ޙަލަބު ސިޓީއާއި މައި ވައިގެ ބަނދަރު އެ ޖަމާޢަތުގެ ބާރުގެ ދަށަށް ގެނެސްފައެވެ.

ސޫރިޔާގެ އަސްކަރިއްޔާގެ މަޞްދަރުތަކުން ބުނެފައިވާ ގޮތުގައި، އަލް-ބޫކަމާލް ސަރަޙައްދީ ހުރަހުން ގިނަ އަދަދެއްގެ ހަނގުރާމަވެރިން އެތެރެވެފައިވެއެވެ. މީގެ ތެރޭގައި އީރާނުން ވާގިވެރިވާ ޢިރާޤީ އަލް-ޙަޝްދު ޝަޢަބިއްޔު ޖަމާޢަތާއި، ކަތާއިބު ޙިޒްބުاللهގެ އިތުރުން ފަތައިމިއްޔޫން ޖަމާޢަތުގެ ހަނގުރާމަވެރިން ހިމެނެއެވެ.

ސޫރިޔާގެ ދާޚިލީ ހަނގުރާމައިގައި އަސަދުގެ ސަރުކާރަށް އީރާނާއި ރަޝިޔާއިން ވަނީ އެހީތެރިކަން ފޯރުކޮށްދީފައެވެ. މިހާރުވެސް ރަޝިޔާގެ އަސްކަރިއްޔާއިން ދަނީ އެޗްޓީއެސްގެ އަމާޒުތަކަށް ވައިގެ ޙަމަލާތައް ދެމުންނެވެ.

2020 ވަނަ އަހަރު ރަޝިޔާއާއި ތުރުކީވިލާތާ ދެމެދު ވެވުނު އެއްބަސްވުމަކާ ގުޅިގެން ސޫރިޔާގެ ދާޚިލީ ހަނގުރާމައިގެ ޙަމަލާތައް މެދުކަނޑާލާފައި ވީނަމަވެސް، މިހާރު އަލުން ހަނގުރާމައިގެ ޙަރަކާތްތައް ފެށިފައިވާކަން ފާހަގަކުރެވެއެވެ.