ވެލާނާ އެއަރޕޯޓުގެ ސީ ޓު އެއަރ ކާގޯ ޚިދުމަތުން 1،000 ޓަނުގެ މުދާ އެކްސްޕޯޓްކޮށްފި

ވެލާނާ އިންޓަނޭޝަނަލް އެއަރޕޯޓުން ފޯރުކޮށްދޭން ފަށާފައިވާ ސީ ޓު އެއަރ ކާގޯ ޓްރާންސްޝިޕްމަންޓް ޚިދުމަތުގެ ތެރެއިން 1،000 ޓަނުގެ މުދާ މިހާތަނަށް އެކްސްޕޯޓްކޮށްފައިވާ ކަމަށް އެއަރޕޯޓު ހިންގާ އެމްއޭސީއެލްއިން ހާމަކޮށްފިއެވެ.

އެމްއޭސީއެލްއިން ބުނެފައިވާ ގޮތުގައި، މި ޚިދުމަތަށް ވާޖިން އެޓްލާންޓޓިކް ގުޅުމާއެކު މިހާރު 12 އެއަރލައިނެއް ބައިވެރިވެފައިވެއެވެ. މީގެ ތެރޭގައި ޓާކިޝް، ގަތަރު، އެމިރޭޓްސް، އިއްތިހާދު، އޭރޯފްލޮޓް، ނިއޯސް، ގަލްފް އެއަރ، ޑިސްކަވަރ، އޮސްޓްރިއަން، ކޮންޑޯ އަދި ބްރިޓިޝް އެއަރވޭސް ހިމެނެއެވެ.

ސީ ޓު އެއަރ ކާގޯގެ ޚިދުމަތަކީ އެމްޕީއެލް މެދުވެރިކޮށް ކަނޑުމަގުން ގެންނަ މުދާ އެމްއޭސީއެލްއިން ރައްކާތެރިކަމާއެކު އަވަހަށް ވައިގެ މަގުން އެކި މަންޒިލްތަކަށް ފޯރުކޮށްދިނުމަށް މިއަހަރުގެ މެއި މަހު ފަށާފައިވާ ޚިދުމަތެކެވެ. މި ޚިދުމަތުގެ ދަށުން މައިގަނޑު ގޮތެއްގައި އެކްސްޕޯޓްކޮށްފައިވަނީ ބަންގްލަދޭޝްއިން ރާއްޖެއަށް ކަނޑުމަގުން އެތެރެކުރާ ގާމެންޓް ޝިޕްމަންޓްތަކެވެ.

އިތުރު އެއަރލައިންތަކުން މި ޚިދުމަތް ދިނުމަށް ގުޅުމާއެކު ވެލާނާ އިންޓަނޭޝަނަލް އެއަރޕޯޓުގެ ކާގޯ ޚިދުމަތް އިތުރަށް ފުޅާވެގެންދާނެ ކަމަށް އެމްއޭސީއެލްއިން ބުނެފައިވެއެވެ. މި ޚިދުމަތާއެކު އެއަރޕޯޓުގެ ކާގޯ ޚިދުމަތް ވަރަށް ބޮޑަށް ފުޅާވެފައިވާ ކަމަށްވެސް އެ ކުންފުނިން ފާހަގަކޮށްފައިވެއެވެ.

ދުނިޔޭގެ ކާގޯ ކަނެކްޓިވިޓީ ލޮޖިސްޓިކްސް ޗެއިންގައި ވެލާނާ އިންޓަނޭޝަނަލް އެއަރޕޯޓުގެ ހިއްސާ އޮތުމުގެ ސަބަބުން ރާއްޖޭގެ އިގްތިސާދަށް ބޮޑެތި ފައިދާތަކެއް ކުރާނެ ކަމަށް އެމްއޭސީއެލްއިން ބުނެފައިވެއެވެ. މި ޚިދުމަތުގެ ސަބަބުން ރާއްޖޭގެ ވައިގެ ބަނދަރުގެ ޚިދުމަތްތައް އިތުރަށް ތަރައްގީވެ، ބައިނަލްއަގްވާމީ ފެންވަރުގައި ރާއްޖޭގެ މަގާމު އިތުރަށް ވަރުގަދަވާނެ ކަމަށް ބެލެވެއެވެ.