އާބަން ޑިވެލޮޕްމެންޓުގެ ބިލް ރައީސުލްޖުމުހޫރިއްޔާ ތަސްދީގު ކުރައްވައިފި

ރާއްޖޭގެ އާބަން ސަރަހައްދުތައް ކަނޑައަޅައި އެފަދަ ސަރަހައްދު ތަރައްގީ ކުރުމާ ގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމުކުރުން ހިމެނޭ ގޮތަށް ރައްޔިތުންގެ މަޖުލީހުން މިދިޔަ މަހުގެ 27 ގައި ފާސްކުރި އާބަން ޑިވެލޮޕްމެންޓުގެ ބިލް ރައީސް މުހައްމަދު މުއިއްޒު ތަސްދީގު ކުރައްވައިފި އެވެ.

މި ގާނޫނުގެ ދަށުން ރާއްޖޭގައި އާބަން ސަރަހައްދުތައް ކަނޑައަޅާ، އެ ސަރަހައްދުތައް ތަރައްގީކޮށް ހިންގުމާގުޅޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެމަތިން ރައީސް އެވެ. އަދި މި ސިޔާސަތުތައް ތަންފީޒު ކުރާނީ އުމްރާނީ ތަރައްގީގެ މަސްއޫލިއްޔަތުތައް ހަވާލައް ހަވާލުކޮށްފައި އޮންނަ ވުޒާރާ އިންނެވެ. މިހާރު ނަމަ އެއީ ހައުސިން، ލޭންޑް އެންޑް އާބަން ޑިވެލޮޕްމެންޓު މިނިސްޓްރީ އެވެ.

މި ގާނޫނުގެ މައިގަނޑު ބޭނުމަކީ ރާއްޖޭގެ އާބަން ސަރަހައްދުތައް ކަނޑައަޅައި އެފަދަ ސަރަހައްދު ތަރައްގީ ކުރުމާ ގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމުކުރުމެވެ. މީގެ އިތުރުން އާބަން ސަރަހައްދުތަކާއި އެފަދަ ސަރަހައްދުތަކުގެ ޒޯނުތަކާއި ގިންތިތަކާއި ބިމުގެ ބޭނުން ކަނޑައެޅުމާއި، އެފަދަ ސަރަހައްދުތައް ތަރައްގީކޮށް ހިންގުމުގެ އަސާސީ މިންގަނޑުތަކާއި އެ ސަރަހައްދުތަކުގައި ހިންގާ ތަރައްގީގެ މަޝްރޫއުތައް މޮނިޓާކޮށް ފިޔަވަޅުއެޅުމާ ބެހޭ އުސޫލުތައް ބަޔާންކުރުން ވެސް ހިމެނެއެވެ.

ގާނޫނު ތަސްދީގު ކުރެއްވުމާއެކު ގެޒެޓުގައި މިއަދު ޝާއިއު ކޮށްފައިވާއިރު ގާނޫނުގައި ބަޔާންކޮށްފައިވާގޮތުން އާބަން ޑިވެލޮޕްމެންޓުގެ ގާނޫނަށް އަމަލު ކުރަން ފަށާނީ އެ ގާނޫނު ތަސްދީގު ކުރާތާ 6 މަސް ފަހުންނެވެ.

ގާނޫނަށް އަމަލުކުރަން ފެށުމާއެކު ގާނޫނުގެ ދަށުން ކަނޑައަޅާ އާބަން ސަރަހައްދުތަކުގެ އާބަން އޭރިޔާ ޑިވެލޮޕްމެންޓު މާސްޓާ ޕްލޭން ތައްޔާރުކޮށް، އެފަދަ ސަރަހައްދުތައް ތަރައްގީކުރާ ފަރާތްތަކަށް ހުއްދަތައް ދިނުމާއި، އެފަރާތްތަކުން އެ ސަރަހައްދުތަކުގައި ކުރިއަށްގެންދާ ތަރައްގީގެ މަސައްކަތްތައް ވިލަރެސްކުރުމަށް "އާބަން ޑިވެލޮޕްމަންޓް އޮތޯރިޓީ" ގެ ނަމުގައި ސަރުކާރުގެ އިދާރާއެއް އުފައްދަން ޖެހޭނެ އެވެ. މި އޮތޯރިޓީ ހިނގަމުންދާނީ އުމްރާނީ ތަރައްގީގެ ސިޔާސަތުތައް ތަންފީޒުކުރުމުގެ މަސްއޫލިއްޔަތު އެއިރެއްގައި ހަވާލުކޮށްފައިވާ ސަރުކާރުގެ ވުޒާރާގ މި އޮތޯރިޓީ ހިނގަމުންދާނީ އުމްރާނީ ތަރައްގީގެ ސިޔާސަތުތައް ތަންފީޒުކުރުމުގެ މަސްއޫލިއްޔަތު އެއިރެއްގައި ހަވާލުކޮށްފައިވާ ސަރުކާރުގެ ވުޒާރާގެ ދަށުން ކަމަށް ވެސް ބުނެފައިވެ އެވެ.

މި ގާނޫނު ފާސްވުމާއެކު، ރާއްޖޭގެ އާބަން ސަރަހައްދުތައް ތަރައްގީކުރުމުގައި ހަރުދަނާ އޮނިގަނޑެއް ގާއިމުވެ، ރާއްޖޭގެ ތަރައްގީއަށް އިތުރު ބާރެއް ލިބިގެންދާނެ ކަމަށް ބެލެވެއެވެ.