ސްޓެލްކޯއިން އެމްއެންޑީއެފަށް ޑްރޯނަކާއި އިތުރު ސާމާނު ހަދިޔާ ކޮށްފި

ސްޓެލްކޯއިން އެމްއެންޑީއެފަށް ޑްރޯން ހަދިޔާ ކުރުމަށް ބޭއްވި ރަސްމިއްޔާތުގެ ތެރެއިން -- ފޮޓޯ/ ސްޓެލްކޯ

އުސް އިމާރާތް ތަކުގެ އަލިފާން ނިންވުމުގައި އެހީތެރިވެދިނުމަށް ޓަކައި ފެން ޖެހުމަށް ބޭނުން ކުރާ ޑްރޯނަކާއި ކަނޑުއަޑީގެ ސާޗް އެންޑް ރެސްކިޔުގައި ބޭނުން ކުރާ ވަސީލަތެއް ކަމުގައިވާ ޑީޕް ޓްރެކާއެއް ސްޓެލްކޯއިން އެމްއެންޑީއެފަށް ހަދިޔާކޮށްފި އެވެ.

ބަންޑާރަ ކޮށީގައި މިއަދު ބޭއްވި ހާއްސަ ރަސްމިއްޔާތެއްގައި ސްޓެލްކޯގެ ފަރާތުން އެމްއެންޑީއެފަށް މި ތަކެތި ހަވާލުކޮށްދެއްވީ އެ ކުންފުނީގެ މެނޭޖިންް ޑައިރެކްޓަރު، ހުސައިން ފަހުމީ އެވެ.

އެމްއެންޑީއެފްގެ ފަރާތުން އެ އާލާތްތަކާ ހަވާލުވެ ވަޑައިގެންނެވީ، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ.

އަލިފާން ނިއްވުމަށް ބޭނުން ކުރާ މި ޑްރޯނަކީ ފެން ހޮޅިއާ އެކު 200 މީޓަރު އުހަށް ދަތުރު ކުރުމުގެ ގާބިލްކަން ލިބިފައިވާ ޑްރޯނެއް ކަމަށް ސްޓެލްކޯ އިން ބުންޏެވެ.

މީގެ އިތުރުން އެ ޑީޕް ޓެރެކާ އަކީ 200 މީޓަރު އަޑިއަށް ދަތުރުކޮށް ރޮބްޓިކް އާރުމްއެއްގެ އެހީއާ އެކު ކަނޑު އަޑިން ތަކެތި ނެގުމުގެ ގާބިލްކަން ލިބިފައިވާ ވަސީލަތެއް ކަމަށް ވެސް ގައުމީ ކަރަންޓު ކުންފުނި ސްޓެލްކޯއިން މައުލޫމާތު ދެއެވެ.

މިއަދުގެ އެ ރަސްމިއްޔާތުގައި ސްޓެލްކޯގެ އިސްވެރީންނާއި ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަހުމަދު ޣިޔާސްގެ އިތުރުން އެމްއެންޑީއެފްގެ ޖެނެރަލް އޮފިސަރުން ބައިވެރިވެފައިވެ އެވެ.

އެމްއެންޑީއެފް ސްޓެލްކޯ