ޕީޕީއެމް އުވާލަން އެ ޕާޓީގެ ސެނެޓުން ނިންމައިފި

ޕްރޮގްރެސިވް ކޮންގްރެސް ޕާޓީ، (ޕީޕީއެމް) އުވާލަން އެ ޕާޓީގެ ސެނެޓުން ނިންމައިފި އެވެ.

ޕީޕީއެމް އުވާލަން ނިންމީ ރޭ ބޭއްވި ސެނެޓުގެ ބައްދަލުވުމުގައި ބައިވެރިވި 42 ސެނެޓަރުންގެ އަގުލަބިއްޔަތުންނެވެ.

މި ބައްދަލުވުމުގެ ރިޔާސަތު ބެލެހެއްޓެވީ އެ ޕާޓީގެ ދެ ނައިބު ރައީސުން ކަމުގައިވާ ފިޝަރީޒް މިނިސްޓަރު އަހުމަދު ޝިޔާމް އާއި ޑިފެންސް މިނިސްޓަރު މުޙައްމަދު ޣައްސާން މައުމޫން އެވެ.

ސެނެޓުގެ މި ނިންމުމުގައި، ޕީޕީއެމް އުވާލުމުން ޕާޓީގެ މުދަލާއި ފައިސާ ދައުލަތަށް ނެގުމަށް ނިންމާފައިވާއިރު، އޭގެ އިތުރުން ޕާޓީ އުވާލުމުގެ މަސައްކަތް ކުރިއަށް ގެންދިއުމުގެ ގޮތުން ކޮމިޓީއެއް އެކުލަވާލުމަށް ވެސް ނިންމި އެވެ.

ރާއްޖޭގައި ދެވަނައަށް އެންމެ މެންބަރުން ގިނަ ޕާޓީ އަކީ  ޕީޕީއެމް އެވެ.

އިލެކްޝަންސް ކޮމިޝަނުގައި އޮންނަ ސިޔާސީ ޕާޓީ ތަކުގެ ދަފްތަރުގައިވާ ގޮތުން ޕީޕީއެމްގައި މިވަގުތު ތިބި މެންބަރުންގެ އަދަދަކީ 34،698 އެވެ.

ޕީޕީއެމަކީ ޑީއާރުޕީގެ އެތެރޭގައި ކުރިން އުފެދުނު ހިޔާލު ތަފާތުވުން ތަކުގެ ތެރެއިން، ރައީސް މައުމޫން އަބްދުއް ގައްޔޫމް އާއި އެ މަނިކުފާނަށް ސަޕޯޓު ކުރާ މެންބަރުން ޑީއާރުޕީން ވަކިވެގެން އުފެއްދި ޕާޓީ އެކެވެ.

އުވާލަން މިއަދު ނިންމި ޕީޕީއެމް ފުރަތަމަ ރަޖިސްޓްރީ ކުރީ 2011، އޮކްޓޯބަރު 27ގަ އެވެ.