ނޮވެމްބަރު މަހު ކުރި ވިއްސާރާގައި މިލިއަނަކަށްވުރެ ގިނަ ރުފިޔާގެ ގެއްލުން

ރާއްޖޭގެ އެކި ސަރަހައްދު ތަކަށް މިދިޔަ މަހު ކުރި ވިއްސާރާގައި ގެތަކަށް ލިބުނު ގެއްލުން 1.1 މިލިއަން ރުފިޔާ އަށް އަރާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެންޑީއެމްއޭ އިން މިއަދު ހާމަކޮށްފައިވާ މައުލޫމާތު ތަކުގައިވާ ގޮތުގައި މިދިޔަ ނޮވެމްބަރު މަހުގެ ނިޔަލަށް ކުރި ވިއްސާރާގައި ގެއްލުން ލިބިގެން 10 ރަށަކުން ރިޕޯޓު ކޮށްފައިވެ އެވެ. އެގޮތުން އެ ރަށްރަށުން މުޅި އެކު 110 ގެއަކަށް އެކިވަރުގެ ގެއްލުންތައް ލިބިފައިވެ އެވެ.

ހުސްވި މަހު ކުރި މި ވިއްސާރާގައި އެންމެ ބޮޑު ގެއްލުމެއް ލިބުނީ ޅ. ކުރެންދޫ އަށެވެ. އެރަށުގެ 97 ގެއަކަށް އެކިވަރުގެ ގެއްލުންތައް ވަނީ ލިބިފަ އެވެ.

މީގެ އިތުރުން މި ހާދިސާތަކާއި ގުޅިގެން ހިފާގެންގުޅޭ ތަކެއްޗާއި އިމާރާތަށް ލިބުނު ގެއްލުމުގެ ޖުމުލަ އަގު، 1.1 މިލިއަން ރުފިޔާ އަށްވުރެ މަތިވާނެ ކަމަށް އެންޑީއެމްއޭ އިން ބުނެ އެވެ.

އެންޑީއެމްއޭ އިން ބުނީ ވިއްސާރާގައި ގެތަކަށް ލިބުނު ގެއްލުން ވަޒަން ކުރެވި، އެހީތެރިކަން ފޯރުކޮށްދިނުމަށް މިހާރު ހުށަހަޅާފައިވާ ވާނެ ކަމަށެވެ.