ރިޓަޔަމަންޓް އެލަވަންސް ކުރިއެކޭ އެއްގޮތަށް ދެމުން ގެންދަން ނިންމައިފި

ސަރުކާރުގެ ވަކިވަކި އިދާރާތަކުން ހިންގާ އަމިއްލަ ރިޓަޔަމަންޓް ސްކީމުގެ ދަށުން އަލަށް ރިޓަޔަރވާ މުވައްޒަފުންނަށް މަހުން މަހަށް ދޭ އެލަވަންސް ހުއްޓާލަން ނިންމި ނިންމުން ބަދަލުކޮށް، އެ އެލަވަންސް ކުރިއެކޭ އެއްގޮތަށް ދެމުން ގެންދަން ސަރުކާރުން މިއަދު ނިންމައިފިއެވެ.

މި ބަދަލު ގެނައުމަށް ނިންމާފައިވާކަން އަންގައި، ޕޭ ކޮމިޝަނުގެ ރައީސް އަދި ފިނޭންސް މިނިސްޓަރު މޫސާ ޒަމީރު ސޮއިކުރައްވައި މިދިޔަ ހަފްތާ އިދާރާތަކަށް ސިޓީއެއް ފޮނުއްވާފައިވީ ނަމަވެސް، އެ ނިންމުން ވަނީ މިހާރު ބަދަލުކޮށްފައެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވި ގޮތުގައި ރިޓަޔަމަންރިޓަޔަމަންޓް ޕެންޝަން އުސޫލަށް ބަދަލު ނުގެންނަން ނިންމީ މުވައްޒަފުންގެ ކަންބޮޑުވުންތަކެއް ހުރުމުންނެވެ. އިއްޔެ ބޭއްވި ވަޒީރުންގެ މަޖިލީހުގައި ފުޅާ ދާއިރާއެއްގައި މަޝްވަރާކުރެއްވުމަށްފަހު، ފިނޭންސް މިނިސްޓްރީން ފޮނުވާފައިވާ ސިޓީއަށް އަމަލުނުކުރަން ރައީސް ޑރ. މުހައްމަދު މުއިއްޒު ނިންމެވި ކަމަށް އޭނާ ވިދާޅުވިއެވެ.

މިހާރު އަމަލުކުރަމުންދާ އުސޫލުތަކުގެ ދަށުން، ދައުލަތުގެ ބަޖެޓުން ޚަރަދުކުރާ ގޮތަށް ގަނޑުކޮށް ފައިސާ ދިނުމުގެ އިތުރުން މަހުން މަހަށް ފައިސާ ލިބޭ ގޮތަށް ވެސް ވަނީ ކަނޑައަޅާފައެވެ. ނަމަވެސް މި އުސޫލުގެ ސަބަބުން "ޑަބަލް ޕެންޝަން" ގެ މައްސަލަ ދިމާވާކަން ފާހަގަކުރެވެއެވެ.

ފިނޭންސް މިނިސްޓްރީން ހާމަކުރި މަޢުލޫމާތުގެ ދަށުން، އެއްފަހަރާ ޕެންޝަން ދިނުމަށް ދައުލަތުން މިދިޔަ އަހަރު 46.1 މިލިއަން ރުފިޔާ ޚަރަދުކޮށްފައިވާއިރު، މި އަހަރު 45.2 މިލިއަން ރުފިޔާ ޚަރަދުކޮށްފައިވެއެވެ. މަހުން މަހަށް ދޫކުރާ އަދަދުގެ ގޮތުގައި 2023 ވަނަ އަހަރު 286.7 މިލިއަން ރުފިޔާ، އަދި މި އަހަރު 339.3 މިލިއަން ރުފިޔާ ވަނީ ޚަރަދުކޮށްފައެވެ.

މި ނިންމުމާ ގުޅިގެން، ރައީސް އޮފީސް، ފުލުހުން، ޑިފެންސް މިނިސްޓްރީ، ކަސްޓަމްސް އަދި އެހެނިހެން ސަރުކާރުގެ އިދާރާތަކުގެ މުވައްޒަފުންނަށް ރިޓަޔަމަންޓް އެލަވަންސް ކުރިއެކޭ އެއްގޮތަށް ލިބެމުންދާނެއެވެ.