މަސްތުވާތަކެތީގެ ކުށްތަކަށް ބޮޑަތި އަދަބުތައް ކަނޑައެޅޭގޮތަށް ޤާނޫނަށް އިސްލާހު ހުށަހެޅުއްވައިފި

މަސްތުވާތަކެތީގެ ވިޔަފާރިން ހޯދާ ފައިސާ އާއި މުދާ ދައުލަތަށް ނެގޭގޮތަށް މަސްތުވާތަކެއްޗާބެހޭ ޤާނޫނަށް އިސްލާހު ހުށަހަޅުއްވައިފިއެވެ.

ސަރުކާރުގެ ފަރާތުން މި އިސްލާހު ރައްޔިތުންގެ މަޖިލީހަށް ހުށަހެޅުއްވީ ގަމު ދާއިރާގެ މެންބަރު ޔޫސުފް ނަޝީދުއެވެ.

މި ބިލުގެ މައިގަނޑު މަޤްޞަދަކީ ރާއްޖޭގައި މަސްތުވާތަކެތީގެ ވިޔަފާރި އިތުރުވަމުންދާތީ، އެކަން ހުއްޓުވުމަށް ޤާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކުރުމެވެ. އަދި މަސްތުވާތަކެއްޗަށް ދެވިހިފާފައިވާ މީހުންނަށް ހަރުދަނާ ގޮތެއްގައި ފަރުވާދީ، މުޖުތަމަޢަށް އަނބުރާ ރުޖޫޢަވެވޭނެ ފުރުޞަތު ދިނުމަށްޓަކައި ނިޒާމު އިތުރަށް ހަރުދަނާކުރުމެވެ.

މި އިސްލާހުގައި، އަލަށް ކޮންޓްރޯލް ކުރަންޖެހޭ މަސްތުވާތަކެތި ކޮންޓްރޯލް ކުރެވޭނެ ނިޒާމެއް ތަޢާރަފުކުރުމާއި، އިތުރު ކުށްތަކާއި އަދަބު ކަނޑައެޅުމާއި، ފަރުވާގެ ނިޒާމު ހަރުދަނާކުރުމާއި، ޑްރަގު ކޯޓު ހިންގުމުގެ އުސޫލުތައް މުރާޖަޢާކުރުން ހިމެނެއެވެ.

ނޭޝަނަލް ޑްރަގް ކައުންސިލްގެ މެންބަރުންގެ އަދަދު 12 އިން 13 އަށް އިތުރުކޮށް، ދީނީ ކަންކަމާގުޅޭ ވުޒާރާގެ މަންދޫބެއް ހިމެނުމަށް ވަނީ ހުށަހަޅާފައެވެ.

މި އިސްލާހުގެ އެންމެ މުހިންމު ބަދަލަކީ މަސްތުވާތަކެތީގެ ކުށްތަކުގައި ހޯދާ މުދަލާއި ފައިސާ ދައުލަތަށް ނެގޭގޮތަށް ބަދަލުކުރުމެވެ. މީގެ ތެރޭގައި ކުށްކުރުމަށް ބޭނުންކުރި ފައިސާ ނުވަތަ މުދާ، ކުށްކޮށްގެން ހޯދާ މުދާ، އަދި ކުށްކޮށްގެން ހޯދަންއުޅޭ ފައިސާ ނުވަތަ މުދާ ހިމެނެއެވެ.

މީގެ އިތުރުން، ރާއްޖެއަށް ވައިގެ މަގުންނާއި ކަނޑުމަގުން އެތެރެކުރާ މަސްތުވާތަކެތި ހުއްޓުވުމަށް ކަސްޓަމްސްގެ އޮފިސަރުންނާއި ފުލުހުންނަށް ލިބޭ ބާރުތައް ވެސް މި ބިލުގެ ދަށުން ވަނީ ހަރުކަށިކޮށްފައެވެ.