ތައިލެންޑުގެ 8 ޕްރޮވިންސެއްގައި ފެންބޮޑުވެ 12 މީހުން މަރުވެއޖެ

ތައިލެންޑުގެ އަށް ޕްރޮވިންސެއްގައި ފެންބޮޑުވުމުގެ ސަބަބުން މަދުވެގެން 12 މީހުން މަރުވެ، އެތައް ލައްކަ ރައްޔިތުންނަށް އަސަރުކޮށްފައިވާ ކަމަށް އެ ޤައުމުގެ މީޑިއާތަކުން ރިޕޯޓުކޮށްފިއެވެ.

ތައި މީޓިއޮރޮލޮޖިކަލް ޑިޕާޓްމަންޓުން ބުނެފައިވާ ގޮތުގައި ބޯކޮށް ވާރޭވެހުމުގެ ސަބަބުން ނުވަ ޕްރޮވިންސެއްގައި ފެންބޮޑުވެފައިވެއެވެ.

މިހާތަނަށް އަށް ޕްރޮވިންސްގެ 553،000 އަށްވުރެ ގިނަ ގޭބިސީއަށް މި ކާރިސާގެ އަސަރުކޮށްފައިވާ ކަމަށް ވެއެވެ. ފަޓަލުންގް ޕްރޮވިންސްގެ 557 ރަށެއްގެ 102،494 ގޭބިސީއަށް އަސަރުކޮށް، 2 މީހުން މަރުވެފައިވާއިރު، ޕަޓާނީ، ޔަލާ އަދި ސޮންގްކްލާ ޕްރޮވިންސްތަކުން 10 މީހުން މަރުވިކަމަށް ރިޕޯޓުކޮށްފައިވެއެވެ.

ތައިލެންޑުގެ މީޓިއޮރޮލޮޖިކަލް ޑިޕާޓްމަންޓުން އިންޒާރުދީފައިވަނީ ދެކުނު ސަރަހައްދުގައި އިތުރަށް ވާރޭވެހި، މި ހާލަތު ޑިސެމްބަރު މަހުގެ ކުރީކޮޅާ ހަމައަށް ދެމިގެންދާނެ ކަމަށެވެ. މިއާއެކު، އިތުރު ގެއްލުންތަކާ ކުރިމަތިލާން ޖެހިދާނެކަމުގެ ބިރު އެބައޮތެވެ.

ތައިލެންޑުގައި ފެންބޮޑުވެފައިވާއިރު އަވައްޓެރި މެލޭޝިއާގެ އުތުރުގެ އެކި ޕްރޮވިންސްތަކުގައިވެސް ފެންބޮޑުވެ، ވޭތުވެދިޔަ ތިން ދުވަހުގެ ތެރޭގައި 10 މީހުން މަރުވެ، 100،000 އަށްވުރެ ގިނަ މީހުން ހިޖުރަކުރަން މަޖުބޫރުވެފައިވާ ކަމަށް އެ ޤައުމުގެ ސަރުކާރުގެ ބަރްނާމާ ނިއުސް އެޖެންސީން ރިޕޯޓުކޮށްފައިވެއެވެ.

ތައިލެންޑަކީ ދެކުނު އޭޝިއާގައި އޮންނަ، އަހަރުގެ ވަކި މޫސުމެއްގައި ބޯކޮށް ވާރޭވެހޭ ޤައުމެކެވެ. ޚާއްޞަކޮށް މޫސުމީ ވައި ބަދަލުވާ ދުވަސްވަރު، މެއި މަހުން އޮކްޓޯބަރު މަހާ ހަމައަށް، ގިނައިން ވާރޭވެހެއެވެ. މި މޫސުމުގައި ބައެއް ފަހަރު ގަދަ ވިއްސާރައާއި ވަޔާ އެކު ވާރޭވެހި، ފެންބޮޑުވުމުގެ ހާދިސާތައް ދިމާވެއެވެ. މިފަދަ ކާރިސާތަކުގެ ސަބަބުން އެތައް ބަޔަކު ގެދޮރު ގެއްލި، ދިރިއުޅުމަށް ބޮޑެތި ގެއްލުންތައް ލިބެއެވެ.

މީގެ އިތުރުންވެސް ދުނިޔޭގެ ގިނަ ޤައުމު ތަކަކަށް މި ދުވަސްވަރު ބޯކޮށް ވާރޭވެހި ފެން ބޮޑުވުމުގެ ހާދިސާތައް ހިނގަމުންދާކަން ފާހަގަކޮށްލެވެއެވެ.