ކެބިނެޓަށް ބަދަލު ގެންނަން އުޅޭ ކަމަށް ބުނެ ފަތުރަނީ ބުހުތާނު ދޮގު

ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ކެބިނެޓަށް ބަދަލުތަކެއް ގެންނަ ވާހަކަ ސަރުކާރުން ދޮގުކޮށްފި އެވެ.

ކެބިނެޓަށް ބައެއް ބަދަލުތައް ގެންނާން ރައީސް ނިންމާފައިވާ ކަމަށް ބުނެ ސޯޝަލް މީޑިއާގައި އަޑު ފެތުރިފައިވާ ވަނިކޮށް ރައީސް އޮފީހުގެ ތަރުޖަމާނު ހީނާ ވަލީދު މިރޭ ކުރެއްވި ޓްވީޓުގައި ވަނީ އެކަން ދޮގު ކުރައްވާފަ އެވެ.

ހީނާ ވިދާޅުވީ ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައި ނުވާ ކަމަށެވެ.

"ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ވާހަކަ ދަންނަވަން" ހީނާ ވިދާޅުވެފައިވެ އެވެ.

ރައީސް މުއިއްޒުގެ ކެބިނެޓަށް ފުރަތަމަ ފަހަރަށް ބަދަލެއް ގެންނަވާފައި ވަނީ މިދިޔަ ސެޕްޓެމްބަރު މަހު ތެރޭގަ އެވެ.

އެ ފަހަރު ގެންނެވި ބަދަލުތަކުގެ ތެރޭގައި ފިނޭންސް މިނިސްޓަރު ކަމުގައި އޭރު ހުންނެވި ޑރ.މުޙައްމަދު ޝަފީގު އެ މަގާމުން އިސްތިއުފާދެއްވުމާ އެކު އޭނާ ހުންނެވި މަގާމަށް އެހައިތަނަށް އައި އިރު، ފޮރިން މިނިސްޓަރު ކަމުގައި ހުންނެވި މޫސާ ޒަމީރު ހަމަޖެއްސެވުމެވެ.

މީގެ އިތުރުން ކުރިން ހެލްތު މިނިސްޓަރުގެ މަގާމުގައި ހުންނެވި ޑރ.އަބްދުﷲ ޚަލީލު ފޮރިން މިނިސްޓަރުގެ މަގާމަށް ހަމަޖައްސަވާ ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީގެ މަގާމުގައި އޭރު ހުންނެވި މުޙައްމަދު ނާޒިމް ހެލްތު މިނިސްޓަރު ކަމަށް ހަމަޖެއްސެވީ އެވެ.

ކެބިނެޓްގައި ޖުމުލަ 22 މިނިސްޓަރުން ތިއްބެވި ނަމަވެސް އެ އަދަދު މިވަގުތު ވަނީ 21އަށް މަދުވެފައެވެ.

އެއީ  ސިއްހީ ހާލުކޮޅު ހުރި ގޮތުން އެގްރިކަލްޗާ މިނިސްޓަރު ޑރ. އާއިޝަތު ރަމީލާ މަގާމުން މިއަދު އިސްތިއުފާ ދެއްވުމުންނެވެ.