މުޅި ރާއްޖޭގެ ކަނޑުތައް މިއަދުވެސް ގަދަވާނެ: މެޓް އޮފީސް

ރާއްޖޭގެ މޫސުން މިދުވަސްވަރު ވަނީ ވަރަށް ބޮޑަށް ގޯސްވެފައި

ރާއްޖޭގެ ކަނޑުތައް މިއަދުވެސް ގަދަވާނެ ކަމަށް މޫސުމާބެހޭ ގައުމީ އިދާރާ (މެޓް އޮފީސް) ން ބުނެފިއެވެ.

މިއަދު އިރުއޮއްސޭއިރު 6:00 އާ ހަމައަށް ލަފާކޮށް، މެޓް އޮފީހުން ބުނެފައިވަނީ މުޅި ރާއްޖޭގައިވެސް ކަނޑުތައް ގަދަވާނެ ކަމަށެވެ.

މެޓް އޮފީހުގެ ލަފާކުރުމުގައި، ދެކުނުގައި ރާޅުގެ އުސްމިން ހުންނާނީ ފަސް ފޫޓާއި އަށް ފޫޓާ ދެމެދުގައެވެ. އުތުރާއި މެދުރާއްޖެތެރޭގައި ރާޅުގެ އުސްމިން ހުންނާނީ ހަތަރު ފޫޓާއި ހަތް ފޫޓާ ދެމެދުގައެވެ. އަދި ދެކުނުގެ ރަށްތަކަށް ވިއްސާރަކޮށް ގުގުރުން އެކަށީގެންވާ ކަމަށާއި، އެހެން ހިސާބުތަކަށް ކެރީގެ އަސަރުކުރާނެ ކަމަށްވެސް މެޓް އޮފީހުން ބުނެފައިވެއެވެ.

ވައިގެ ހާލަތާ ގުޅޭގޮތުން، މެޓް އޮފީހުން ލަފާކޮށްފައިވަނީ ހުޅަނގާއި ހުޅަނގު އުތުރުން ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެ ކަމަށެވެ. އެހެން ހިސާބުތަކަށް ގަޑިއަކު 13 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށްވެސް ބުނެފައިވެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލުގެ ބާރުމިނަށް ވައި ގަދަވާނެ ކަމަށްވެސް މެޓް އޮފީހުން ލަފާކޮށްފައިވެއެވެ.

މި ހާލަތާ ގުޅިގެން، ކަނޑުދަތުރުފަތުރު ކުރާ ފަރާތްތަކުން ސަމާލުވުމަށާއި، ރަށްރަށުގެ އިދާރާތަކުން ވެސް މޫސުމަށް އަންނަ ބަދަލުތަކަށް ސަމާލުވެ ތައްޔާރުވެ ތިބުމަށް މެޓް އޮފީހުން އިލްތިމާސްކޮށްފައިވެއެވެ.

މޫސުން