ސިއްހީ ހާލަތު ދަށްވުމާ ގުޅިގެން މިނިސްޓަރ ރަމީލާ އިސްތިއުފާ ދެއްވައިފި

މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ، ޑރ. އާއިޝަތު ރަމީލާ، އެ މަޤާމުން އިސްތިއުފާ ދެއްވައިފިއެވެ.

ރައީސް އޮފީހުން މިއަދު ނެރުނު ބަޔާނެއްގައި ބުނެފައިވަނީ، ސިއްހީ ހާލަތު ހުރި ގޮތުން ރަމީލާ އިސްތިއުފާ ދެއްވުމުން، ރައީސް މުހައްމަދު މުއިއްޒު އެ އިސްތިއުފާ ޤަބޫލުކުރައްވާފައިވާ ކަމަށެވެ.

މިނިސްޓަރ ރަމީލާ ވަނީ ގޮހޮރުގެ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވަނިކޮށް އިސްތިއުފާ ދެއްވާފައެވެ. އޭނާގެ އާލާސްކަންފުޅުގެ ފަރުވާއަށްޓަކައި މީގެ ކުރިން ވެސް އިންޑިއާއަށް ވަޑައިގެން ގިނަ ދުވަސްތަކެއް ހޭދަކުރައްވާފައިވެއެވެ. ރަމީލާއަށް ކެންސަރު ޖެހިވަޑައިގެންފައިވާކަން އެނގިވަޑައިގަތީ އެންމެ ފަހު ސްޓޭޖުގައި ހުއްޓައެވެ.

ރައީސް އޮފީހުގެ ބަޔާނުގައި ބުނެފައިވަނީ، އާލާސްކަންފުޅާ އުޅުއްވަމުން ވެސް މަޤާމުގެ ހައިސިއްޔަތުން ރަމީލާ ރައީސް މުއިއްޒަށް ދެއްވި އެއްބާރުލެއްވުމަށް އެމަނިކުފާނު ޝުކުރު އަދާކުރައްވާ ކަމަށެވެ. "ޑރ. އާއިޝަތު ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އަޅުގަނޑަށް ލިބުނު ވަރަށް ބޮޑު އުފަލެކެވެ." ރައީސް މުއިއްޒު ވިދާޅުވިއެވެ.

ރައީސްގެ ބަޔާނުގައި އިތުރަށް ވިދާޅުވެފައިވަނީ، ކުރިއަށް އޮތް ތަނުގައި ވެސް ރަމީލާގެ ޚިދުމަތް ދިވެހި ޤައުމަށް ލިބޭނެކަން ޔަޤީންކުރައްވާ ކަމަށެވެ. އަދި ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި، މާތްﷲގެ ތަނަވަސް ރަޙުމަތްފުޅުން އަވަސް އަދި ދާއިމީ ޝިފާއެއް މިންވަރު ކުރެއްވުމަށް ދުޢާ ކުރައްވާފައިވެއެވެ.

ރަމީލާ ވަނީ މީގެ ކުރިން ހެލްތު މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވާފައެވެ. އޭނާ ސަރުކާރަށް ޚިދުމަތް ކުރައްވަން ފެއްޓެވީ 1990 ވަނަ އަހަރު ނަރުހެއްގެ ގޮތުގައެވެ. މިހާރު އިސްތިއުފާ ދެއްވާފައިވާއިރު، ރަމީލާ ވަނީ ދިވެހި ސަރުކާރަށް 30 އަހަރަށްވުރެ ގިނަ ދުވަހު ޚިދުމަތް ކުރައްވާފައެވެ.