އުމްރާގައި ފުރަތަމަ ފަހަރަށް ޓްރެކިންގ ޑިވައިސް ބޭނުންކުރަނީ

ޙައްޖު ކޯޕަރޭޝަނުން މި މަހު ކުރިއަށްދާ އުމްރާ ދަތުރުގައި ފުރަތަމަ ފަހަރަށް ޓްރެކިންގ ޑިވައިސް ބޭނުންކުރުމަށް ނިންމައިފިއެވެ.

މިއީ އުމްރާގައި މި ޑިވައިސް ބޭނުންކުރާ ފުރަތަމަ ފަހަރު ނަމަވެސް، މިދިޔަ އަހަރުގެ ޙައްޖުގައި ކޯޕަރޭޝަނުން ވަނީ މި ޓެކްނޮލޮޖީ ބޭނުންކޮށްފައެވެ.

ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން ޙައްޖު ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ އަލީ ޝަރީފް ވިދާޅުވީ، ކުރީގައި މީހުން ގެއްލިގެން ގިނަ ވަގުތު ހޭދަވުމުގެ ސަބަބުން ނަފްސާނީ ގޮތުން ބޮޑެތި އަސަރުތައް ކުރިމަތިވެފައިވާ ކަމަށެވެ. ނަމަވެސް ނިމިދިޔަ ޙައްޖުގައި ޓްރެކިންގ ޑިވައިސް ބޭނުންކުރުމުން، ގެއްލޭ މީހުން އަވަހަށް ހޯދައި ގެނެވުނު ކަމަށް އޭނާ ފާހަގަކުރެއްވިއެވެ.

މި މަހުގެ އުމްރާ ދަތުރަކީ ޙައްޖު ކޯޕަރޭޝަންގެ ހަވާލުގައި އެންމެ ގިނަ މީހުން އުމްރާއަށް ދާ ފަހަރު ކަމަށް އަލީ ޝަރީފް ވިދާޅުވިއެވެ. މި ދަތުރުގައި 800 އެއްހާ މީހުން ބައިވެރިވާ ކަމަށާއި، ކޮންމެ މީހަކަށް ވެސް ޓްރެކިންގ ޑިވައިސްގެ ޓެގެއް އަޅުވާނެ ކަމަށް އޭނާ ހާމަކުރެއްވިއެވެ.

ޙައްޖާއި އުމްރާގެ އަޅުކަމަކީ ގިނަ އަދަދެއްގެ މީހުން ޖަމާވާ އަޅުކަމަކަށްވާތީ، މީހުން ގެއްލި މަގުއޮޅުމަކީ އާންމު ކަމެކެވެ. މި ޓެކްނޮލޮޖީ ބޭނުންކުރުމުން، ގެއްލޭ މީހުން އަވަހަށް ހޯދައި، އެ މީހުންގެ ރައްކާތެރިކަން ކަށަވަރުކުރުމަށް ފަސޭހަވާނެ ކަމަށް ބެލެވެއެވެ.