މާލެއަކީ ޒީނަތްތެރި ރީތި ޗާލު މާލެ އަކަށް ވާތަން ދެކެން ބޭނުން: ފަހުމީ

މާލެއަކީ ޒީނަތްތެރި ރީތި ޗާލު މާލެ އަކަށްވެ، އަދި މިތަނަށް ޒިޔާރަތް ކުރާ މީހުންވެސް މާލެ އަކީ ޒީނަތްތެރި ތަނެކޭ ބުނަން ސްޓެލްކޯއިން އަބަދު ވެސް ބޭނުންވާ ކަމަށް އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ މިއަދު ވިދާޅުވެއްޖެއެވެ.

ސްޓެލްކޯގެ ސަބް ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ތަތްކޮށްފައިވާ އިޝްތިހާރު ފަދަ ތަކެތި ނައްޓައި، ސަބް ސްޓޭޝަންތަކާއި ޑިސްޓްރިބިއުޝަން ފޮށިތައް ސާފު ކުރުމަށް އެ ކުންފުނީގެ މުވައްޒަފުން ހިންގައި "ޗާލު ވެށި – މަގޭ ޒިންމާ" ހަރަކާތް މިއަދު ވަނީ ފަށާފައެވެ.

މި ހަރަކާތް ފައްޓަވައިދެއްވީ އެންވަޔަރަމަންޓް މިނިސްޓަރު ތޯރިގު އިބްރާޙީމް އާއި މާލެ ސިޓީގެ މޭޔަރު އާދަމް އާޒިމް އަދި އެމްޑީ ޙުސައިން ފަހުމީއެވެ.

އެތަނުގައި ހުންނަވާ ވާހަކަފުޅު ދައްކަވަމުން ފަހުމީ ވިދާޅުވި ގޮތުގައި މާލެ ސިޓީއަކީ ނުހަނު ހިތްފަސޭހަ އަދި އެހާމެ ޒީނަތްތެރި ރަށެއްގެ ގޮތުގައި އޮތުމަކީ އެންމެ އެދިވަޑައިގަންނަވާ ގޮތެވެ.

އެ މަސައްކަތުގައި މާލޭގައި ދިރިއުޅޭ ހުރިހާ އެންމެންގެ އެހީތެރިކަަމާއި އެއްބާރުލުން ވަރަށް ބޮޑަށް ބޭނުންވާނެ ކަން ފާހަގަ ކުރައްވައި ފަހުމީ ވިދާޅުވީ އެކަމުގައި ސްޓެލްކޯ އިން ވެސް މުހިންމު ދައުރެއް އަދާ ކުރާނެ ކަމަށެވެ.

"އަޅުގަނޑުމެން ދެކޭހިތް ވަނީ މާލެއަކީ ޒީނަތްތެރި ރީތި ޗާލު މާލެ އަކަށް ވާތަން. އަދި މާލެއަށް ޒިޔާރަތް ކުރާ މީހުން ވެސް މި ރަށަކީ ޒީނަތްތެރި ތަނެކޭ ބުނާ އަޑު އަހަން ސްޓެލްކޯއިން އަބަދު ވެސް ބޭނުންވޭ،" ފަހުމީ ވިދާޅުވި އެވެ.

އެމްޑީ ފަހުމީ ވިދާޅުވީ ސްޓެލްކޯއިން މި ފެށި މަސައްކަތާ އެކު ޑިސްޓްރިބިއުޝަން ފޮށިތަކާ ސަބް ސްޓޭޝަންތައް ރީތިކޮށް ބެހެއްޓުމަށް ހާއްސަ އިސްކަމެއް ދީގެން މަސައްކަތްތަކެއް ކުރާނެ ކަމަށެވެ.