ގައުމިއްޔަތު ކުރިއަރުވަން ރައީސަށް އެއްބާރުލުން ދިނުމަށް އެދިވަޑައިގެންފި

ދިވެހި ގައުމިއްޔަތުގެ ކޮލެޖު ގާއިމު ކުރައްވައި، ގައުމިއްޔަތުގެ އިސްވަރު އުފައްދަވައި، ގައުމީ ކަންކަން އެންމެ އުހަށް ނަންގަވަން، ރައީސުލްޖުމްހޫރިއްޔާ ކުރައްވަމުން އެ ގެންދަވާ މަސައްކަތްޕުޅަށް އެންމެހާ ދިވެހީން އެއްބާރުލުން ދިނުމަށް ނައިބު ރައީސް ހުސެއިން މުޙައްމަދު ލަތީފް އެދިވަޑައިގެންފި އެވެ.

އެމަނިކުފާނު މިކަމަށް އެދިވަޑައިގަތީ މިއަދު ހެނދުނު ކުރިއަށްދިޔަ "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މިއަދުގެ ރަސްމިއްޔާތުގައި ނައިބު ރައީސް ވަނީ ރައީސް ޑރ. މުއިއްޒު، ދިވެހީންގެ އަމިއްލަވަންތަ ކަމާއި ގައުމިއްޔަތު ހިމާޔަތް ކުރެއްވުމަށް ސަމާލުކަން ދެއްވާ މިންވަރު ފާހަގަކުރައްވާފަ އެވެ.

އެގޮތުން ތައުލީމީ މަންހަޖުގައި ގައުމިއްޔަތު، ވަކި މާއްދާއެއްގެ ގޮތުގައި ހިމެނުއްވުމާއި، ދިވެހި ދިދަ އަށާއި ދިވެހީންގެ ގައުމީ ސަލާމަށް ހާއްސަ އިސްކަމެއް، އެމަނިކުފާނު ދެއްވާކަން ރައީސުލްޖުމްހޫރިއްޔާގެ ނައިބު ފާހަގަކުރެއްވި އެވެ.

ނައިބު ރައީސްގެ ވާހަކަފުޅުގައި ދިވެހީންނަކީ ވަރަށް ނަސީބުވެރި ބައެއްކަމުގައި ފާހަގަ ކުރައްވަމުން ވިދާޅުވީ އެގޮތުން ރާއްޖޭގެ ގުދުރަތީ ރީތިކަމުގެ ވާހަކަ ދުނިޔޭގެ އެކި ކަންކޮޅުތަކުގައި މަޝްހޫރު ވެފައިވާ ކަމަށެވެ.

މިމޭރުމުން ވާހަކަފުޅު ކުރިއަށްގެންދަވަމުން، ދިވެހި ބަހުގެ ޗާލުކަމާ ރާއްޖޭގެ ގައުމިއްޔަތުގެ ބަހާތަކަކީ ވެސް ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށްދޭންޖެހޭ ކަމުގައި އެމަނިކުފާނު ވިދާޅުވިއެވެ.

ހަމައެއާ އެކު ރާއްޖޭގެ އަމާންކަން، ދިވެހީންގެ އެކުވެރިކަން، ޚުލްގު ހެޔޮކަން މި ގައުމަށް އަންނަ ކޮންމެ ފަތުރުވެރިއަކަށް ޢަމަލީގޮތުން ދެއްކުމަށް އެމަނިކުފާނު ބާރުއެޅުއްވި އެވެ.