ހައިކޯޓު މާދަމާއިން ފެށިގެން ރިސެސްއަށް، ބައެއް މުހިންމު މަސައްކަތްތައް ކުރިއަށްދާނެ

މާދަމާއިން ފެށިގެން ހައިކޯޓް ރިސެސްއަށް ދާނެ

މާދަމާއިން ފެށިގެން ޑިސެމްބަރު މަހުގެ ނިޔަލަށް ހައިކޯޓުން ރިސެސްއަށް ދިއުމަށް ނިންމައިފިއެވެ.

މިކަން ހާމަކޮށްފައި ވަނީ އެ ކޯޓުން މިއަދު ނެރުނު އިއުލާނެއްގައެވެ. އެ އިއިލާނުގައި ރިސެސްގެ މުއްދަތުގައި ފަނޑިޔާރުންގެ އާންމު މަޖިލީހުން ކުރަން ނިންމާފައިވާ ކަންކަން ވެސް ވަނީ ހާމަކޮށްފައެވެ.

ކުރިއަށް އޮތް އެއް މަސްދުވަހު އެ ކޯޓުން ކުރާނެ މަސައްކަތްތަކުގެ ތެރޭގައި ހުކުމް ކުރުމަށް ބާއްވާ ޝަރީއަތުގެ މަޖިލިސްތައް ބޭއްވުމާއި، B12 ސެކްޝަނުން ބަލާ އަމުރުތަކާއި މޮނިކޮން އަމުރުތަކާއި އަވަސް ތަބީއަތުގެ އަމުރުތަކާއި ހުކުމް ތަންފީޒުކުރުން އަވަސް ކުރުމުގެ އަމުރުތަކާއި އިޖުރާއީ އިއުތިރާޟާ ގުޅޭ ނިންމުންތަކުގެ ތެރެއިން މުއްދަތު ހަމަވާ މައްސަލަތައް ހިމެނެއެވެ.

ހައިކޯޓުން އަންނަ މަހު ރިސެސްއަށް ދާކަން އިއުލާނުކޮށްފައި ވާއިރު، ސުޕްރީމް ކޯޓާއި ކްރިމިނަލް ކޯޓުން އަދި ރިސެސްއަށް ދާކަން ނުވަތަ ނޫންކަން ހާމަކޮށްފައެއް ނުވެއެވެ. އާންމުކޮށް ދަށު ކޯޓުތަކުން ޑިސެމްބަރު މަހު ރިސެސްއަށް ދެއެވެ.

ރިސެސްގެ މުއްދަތުގައި އާންމު އަޑުއެހުމެއް ކޯޓުގައި ކުރިއަށް ނުދާނެއެވެ. ނަމަވެސް ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހޭކަމަށް ބަޔާންކޮށްފައިވާ ހާލަތެއް އައިސްފިނަމަ އެ މަސައްކަތެއް ކުރަން ޖެހޭނެއެވެ.

ކޯޓުތަކުގެ ގާނޫނުގައިވާ ގޮތުން، ކޯޓުތައް ރިސެސްއަށް ދިޔަ ނަމަވެސް އިދާރީ މަސައްކަތްތަކާއި މައްސަލަ ބަލައިގަތުން މެދުކެނޑުމެއްނެތި ކުރިއަށްގެންދާނެއެވެ.

ސްޕްރީމް ކޯޓު