ރަކީދޫން ތެޔޮ އެންދުން ހުއްޓާލައި މުޅި ރަށް އެކީ ސޯލާ ހަކަތައަށް ބަދަލުކޮށްލަނީ

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ފަންޑުކޮށްގެން ވ. ރަކީދޫގައި ގާއިމުކޮށްފައިވާ ސޯލާ ޕީވީ ހައިބްރިޑް ޕަވާ ސިސްޓަމްތަކުން ކުރިއަށް އޮތް ދެ ހަފްތާ ތެރޭގައި މުޅި އެ ރަށަށް ކަރަންޓު ދެވޭވަރު ވާނެ ކަމަށް އެ ކުންފުނިން ހާމަކޮށްފިއެވެ.

ރަކީދޫގައި އެ ޕްރޮޖެކްޓުގެ މަސައްކަތް ކުރިއަަށް ގެންދާ ގޮތާއި މިހާތަނަށް ކުރެވިފައިވާ މަސައްކަތްތަކުގެ އެންމެ ފަހުގެ އަދާހަމަ ސްޓެލްކޯ އިން އިއްޔެ ވަނީ ނޫސްވެރީންނަށް ދައްކާލާފައެވެ.

އެތަނުގައި މީޑިއާތަކަށް މައުލޫމާތު ދެއްވަމުން ސްޓެލްކޯގެ ޖެނެރަލް މެނޭޖަރު އިބްރާހީމް ނިޒާމް ވިދާޅުވީ ޕްރޮޖެކްޓުގެ ބޮޑު ބައި މިހާރު ނިމިފައިވާ ކަމަށާއި އެހެންވެ، އަމާޒަކީ ކުރިއަށް އޮތް ދެ ހަފްތާ ތެރޭގައި އިންޖީނު ނުހިންގައި މުޅި ރަށަށް ބޭނުންވާ ކަރަންޓު ފޯރުކޮށްދިނުން ކަމަށެވެ.

"އަޅުގަނޑުމެންގެ ޓާގެޓަކީ ކުރިއަށް އޮތް ދެ ހަފްތާ ތެރޭގައި 100 ޕަސެންޓް ރިނިއުބަލް. އިންޖީނު ނުހިންގާ ސޯލާ ހަކަތަ އިން މުޅި ރަށަށް ކަރަންޓު ފޯރުކޮށްދިނުން. އަދި ދަންނަވާލަން ބޭނުންވޭ، މިއީ އެންމެ ޒަމާނީ ފުލް އޮޓަމެޓިކް ސިސްޓަމްތަކެއް ކަން،" ނިޒާމް ވިދާޅުވިއެވެ.

އެކްސްގައި ކުރެއްވި ޕޯސްޓެއްގައި ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ، މި ނޮވެމްބަރު 26 ގައި ވިދާޅުވެފައިވަނީ ސޯލާ އަދި ބެޓެރި ސްޓޯރޭޖާ އެކު ރަކީދޫގައި ޖަނަރޭޓަރު ހިންގަން ޖެހެނީ ކޮންމެ ދުވަހަކު ވެސް އެންމެ ދެ ގަޑިއިރަށް ކަމަށެވެ.

ފަހުމީ ވަނީ މުޅި ރާއްޖޭގައި އުފައްދާ ހަކަތައިގެ ތިންބައިކުޅަ އެއްބައި ނުވަތަ 33 އިންސައްތައަކީ އިޔާދަކުރަނިވި ހަކަތައަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތަސައްވުރަށް ޝުކުރު އަދާކުރައްވާފަ އެވެ.

ގައުމީ ކަރަންޓު ކުންފުނީގެ މި މަޝްރޫއުގެ ސަބަބުން އެ ތަނުން ޑީސަލަށް ބަރޯސާވާ މިންވަރު ކުޑަކޮށް، ކަރަންޓު ޔުނިޓެއް އުފައްދަން ކުރާން ޖެހޭ ހޭދަ ބޮޑުތަނުން ދަށަށް ދާނެއެވެ.

ރަކީދޫ، އާބާދީގައި 373 މީހުން ތިބި ނަމަވެސް މިހާރު ރަށުގައި ދިރިއުޅެމުން އަންނަނީ 67 މީހުންނެވެ. މި ރަށުގެ ގިނަ މީހުން ދިރިއުޅެނީ މާލޭ ގައްޔާއި ކައިރި ރަށްރަށުގައެވެ.