މޫސުން ގޯސްވުމާ ގުޅިގެން ރާއްޖޭގެ ދެކުނަށާއި އުތުރަށް ހުދު ސަމާލު ނެރެއްޖެ

މޫސުން ގޯސްވެ، މޫސުމާ ބެހޭ އިދާރާ (މެޓް އޮފީސް) އިން ރާއްޖޭގެ ދެކުނަށާއި އުތުރަށް ހުދު ސަމާލު ނެރެފިއެވެ.

މިގޮތުން މޫސުމާ ބެހޭ އިދާރާއިން ވަނީ މިއަދު ހެނދުނު 6:35 އިން ފެށިގެން މިއަދު މެންދުރު 12:30 އާ ހަމައަށް ލ އަތޮޅުން ފެށިގެން އައްޑޫ ސިޓީއަށް އަދި ހއ އަތޮޅުން ފެށިގެން ރ އަތޮޅަށް ހުދު ސަމާލު ނެރެފައެވެ.

މޫސުމާ ބެހޭ އިދާރާއިން ބުނީ، މި ސަރަހައްދަށް ބޯކޮށް ވާރޭވެހުމާއެކު ގުގުރުމާއެކު، ގަޑިއަކު 19 މޭލާއި 24 މޭލާ ދެމެދުގައި ވައިޖެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެކަމަށް ލަފާކުރާ ކަމަށެވެ.

މިއާއެކު، އެ އިދާރާއިން ވަނީ ކަނޑުދަތުރުކުރައްވާ ފަރާތްތަކުން މޫސުމަށް ސަމާލުވުމަށް އިލްތިމާސްކޮށްފައެވެ. މޫސުން ގޯސްވެފައިވާ މި ދަނޑިވަޅުގައި ދަތުރުފަތުރު ކުރާއިރު ވަރަށް ބޮޑަށް ސަމާލުވުމަށް އެ އިދާރާއިން އާންމުންނަށް އިލްތިމާސްކޮށްފައިވެއެވެ.

މޫސުމަށް އަންނަ ބަދަލުތަކާ ގުޅޭ އެންމެ ފަހުގެ މަޢުލޫމާތު ހޯދުމަށް މޫސުމާ ބެހޭ އިދާރާގެ ވެބްސައިޓާއި ސޯޝަލް މީޑިއާ ޗެނަލްތަކަށް ޒިޔާރަތްކުރުމަށް އާންމުންނަށް އިރުޝާދު ދީފައިވެއެވެ.