ލިވަޕޫލްގެ ކޮނާޓޭއަށް އަނިޔާވެ ދެތިން ހަފްތާއަށް ކުޅުމާ ދުރަށް

ލިވަޕޫލަށް ކުޅެމުން އަންނަ ފްރާންސްގެ މިޑްފީލްޑަރު، އިބްރާހިމާ ކޮނާޓޭ (25) އަށް ލިބުނު އަނިޔާގެ ސަބަބުން ކުރިއަށް ހުރި މެޗުތައް ގެއްލޭނެ ކަމަށް ރިޕޯޓްތައް ބުނެފި އެވެ. ކޮނާޓޭއަށް އަނިޔާވީ، ބުދަ ދުވަހުގެރޭ ޗެމްޕިއަންސް ލީގުގައި ލިވަޕޫލުން އަމިއްލަ ދަނޑުގައި، ރެއާލް މެޑްރިޑް އަތުން 2-0 އިން މޮޅުވި މެޗުގައެވެ.

ރިޕޯޓްތައް ބުނާގޮތުގައި، 2-3 ހަފްތާގެ މުއްދަތަކަށް ކޮނާޓޭ ކުޅުމާ ދުރުގައި ހުންނަން ޖެހޭނެ އެވެ. ޑިސެމްބަރު މަހު ލިވަޕޫލުން ނުވަ މެޗު ކުޅެން ޖެހޭއިރު، ކޮނާޓޭ އަށް އެންމެ ފުރަތަމަ ގެއްލޭނެ މެޗަކީ، މާދަމާރޭ ލީގުގައި މެންޗެސްޓާ ސިޓީއާ ބައްދަލުކުރާ މެޗެވެ.

ކޮނާޓޭ ބުނީ، ރަނގަޅު ފޯމެއްގައި ކުޅެމުން އަންނަނިކޮށް އަނިޔާގެ މައްސަލަ ދިމާވުމަކީ މާޔޫސްކަމެއް ނަމަވެސް ޓީމަށް އެހީތެރިވެވެން އޮތް ގޮތަކަށް އެކަން ކުރުމުގެ އިތުރުން، ކުރިއަށް ހުރި ދުވަސްތަކުގައި ރިކަވަރީ އަށް މަސައްކަތްކޮށް ވަރުގަދަ އަށް އެނބުރި އަންނަން ބޭނުންވާ ކަމަށެވެ.

އާރްބީ ލައިޕްޒިގުން 2021 ވަނަ އަހަރު 40 މިލިއަން ޑޮލަރަށް ލިވަޕޫލަށް ބަދަލުވި ކޮނާޓޭ އަކީ މި ސީޒަނުގައި ލިވަޕޫލާ ހަވާލުވި ނެދަލެންޑްސްގެ ކޯޗު އާނާ ސްލޮޓްގެ އިތުބާރު ހޯދާފައިވާ ކުޅުންތެރިއެކެވެ. ޕްރިމިއާ ލީގުގައި އެންމެ ރަނގަޅު ޑިފެންސިވް ޕާޓްނާޝިޕެއް މި ސީޒަނުގައި އޮތް ލިވަޕޫލްގެ ގިނަ މެޗުތަކުގައި އެއްކޮށް ކުޅުނީ ކެޕްޓަން، ވާޖިލް ވެން ޑައިކާ އެކު ކޮނާޓޭ އެވެ.

ލިވަޕޫލް މި ވަގުތު އޮތީ ޗެމްޕިއަންސް ލީގާއި އިނގިރޭސި ޕްރިމިއާ ލީގުގެ އެއް ވަނައިގަ އެވެ. އަދި ލީގު ކަޕްގެ ކުއާޓާ ފައިނަލުގަ އެވެ. ކޮނާޓޭގެ މި އަނިޔާއާ އެކު، ވެން ޑައިކާ އެކުގައި، ދެން ފަހަތަށް ކުޅޭނީ ޖަރަލް ކުއަންސާ ނޫނީ ޖޯ ގޯމޭޒް އެވެ.